Wanrah u EM Finance ïa ka mang tyngka ba lai bnai jong ka KHADC ka ba `37 klur duna
Shillong, Rymphang 18: Ka sngi sdang jong ka dorbar mang tyngka ka Khasi Hills Autonomous District Council (KHADC) u Executive Member ba peit ïa ka tnad Finance u Bah Seibor Warbah u la wanrah ka mang tyngka ba shipor ne ka Vote on Account ba tang lai bnai na ka bynta jong u snem 2026-2027.
Haba wanrah ia kane ka Vote on Account jong ka jingmang tyngka na ka bynta ka jingpynlut na ka bynta lai bnai u Bah Seibor Warbah u la ong ba kane kan dei naduh ka Shi tarik u bnai Ïaiong haduh ka 30 tarik u bnai Jylliew, 2026.
U Bah Seibor u la ïathuh ba ka jingmang tyngka jong ka jingpynlut na ka bynta lai bnai ka long T.36, 99, 83, 830 klur.
Ka Executive Committee kam pat lah ban wanrah ïa ka mang tyngka kaba pura namar ba ka council ka dang hap ban ïoh jingkhein tad haduh ka taiew ba khatduh jong u bnai Lber mynta u snem.
U Bah Seibor u la ïathuh ba ïa ka mang tyngka kaba pura jong ka Khasi Hills Autonomous District Council yn sa wanrah pat ha ka sien shong dorbar ka ban wan.
Ka jingmang tyngka na ka bynta kit and trei kam bapher bapher jong ka KHADC ka kynthup ïa ka tnad General Administration Department (GAD) ka jingmang ban pynlut ka long T.9, 14, 51, 600 klur, katba ha ka tnad Law la mang ban pynlut kumba T. 18, 53, 920 lak.
Ha kaba ïadei bad ka tnad Revenue Budget & Finance Department la mang tyngka ban pynlut ka long T. 2, 76, 64, 360 klur, katba ha ka tnad Forest Administration Department ka jingmang tyngka ban pynlut ka long T. 2, 84, 41, 860 klur bad ha kaba ïadei bad ka tnad Administration of Justice & Judicial Department la mang T. 1, 80, 43, 850 klur.
U Bah Seibor u la ïathuh ba ha kaba iadei bad ka tnad Legislative Department ka mang tyngka ban pynlut ka long T. 2, 36, 39, 150 klur bad ha kaba ïadei bad ka tnad pule puthi ka jingmang ban pynlut ka long T. 4, 11, 520 lak ha ka tnad Civil Work & Development ka mang tyngka ban pynlut ka long T. 16, 24, 94, 700 klur bad ha ka Enforcement Scheme for protection of Tribal Land & Interest ka mang tyngka ka long T. 1, 59, 82, 870 klur.