Nongstoiñ, Rymphang 18: Da ki phew snem ki nongshong shnong bad ki samla jong ka shnong Seiñduli I, Seiñduli II, Mawsura, Tumtum bad kiwei kiwei ki shnong ha ka thaiñ kib ahap hapoh ka Mawshynrut constituency ki la angnud ban don ïa ka madan ïalehkai kaba paka khang ba kin lah ban pyntbit bad kyntiew ïa ki samla ka thaiñ ha kiba bun ki kam ïalehkai hynrei kim shym pat la ïoh satia.
Dei tad ha kane ka kynti ha kaba ki paitbah ki la jied ïa u bah Methodius Dkhar kum u MLA ba ka jingangnud jong ki ka la urlong.
Ha ka jingleit jngoh jong u nongthohkhubor jong u Mawphor ïa kitei ki shnong ha kane ka sngi balang ka 18 tarik Rymphang la ïoh ban ïakynduh bad ban ïakren bad ki riew rangbah bad ki paitbah nongshong shnong ha kaba ïadei bad ka jingtrei kam jong u MLA ba mynta ha kaba ki la pynpaw ba ka jingtrei kam jong u MLA ba mynta ka la pynhun bad pynkmen ïa ki paitbah namarkumba u la kular ha shuwa ka Election u la pyrshang katba kot la ka bor ban pynurlong.
Na ka liang ki paitbah ki la ong ruh ba utei u nongmihkhmat um ju bun ktien kum kiwei kiwei hynrei ïa kano kano ka jingthmu kaba u mut ban leh ki paitbah kim pat tip ei ei hynrei ki dak ki shim bad ki kam ki pynishai ba u dei uba trei shitom bad uba don ka jingkitkhlieh na ka bynta ka roi ka par hapoh ka constituency.
Ha katei ka sngi la ïoh ban leit peit ruh ïa ka madan ïalehkai kaba utei u nongmihkhmat u la pynïoh na ka bynta ki paitbah jong kitei ki shnong bad la lap ba ka jingtrei ka la ïaid shait shait.
U bah Pherikstone Lyngdoh uwei na ki riew rangbah jong ka shnong Seiñduli haba ïakren bad u nongthohkhubor u la ong ba ha ki snem kiba la dep katei ka madan ïalehkai kadang long kaba rit bha bad lada pynlong kino kino ki lympung ïalehkai phutbol hap ban pynïalehkai tang khyndai ngut shi liang hynrei hadien ba u bah Methodius Dkhar u la shah jied kum u MLA ha u snem ba la dep u la pynïoh ïa ka mang pisa kaba ar klur hynñiewphewlakh tyngka na kabynta ban pynbit pynbiang ïa katei ka madan ïalehkai.
Ha kajuh ka por u la ong ba lada la pyndep bha ka jing jrong jongkatei ka madan ka long shispah arphew mitar bad ka pynkiang pat hynriewphew mitar bad ka lah ban shipor satang kumba ar ne lai taïew ban pyndep ïa katei ka madan ïalehkai.
Nalor kata u la ong ruh ba na ka jingshimkhia bad ka jingtrei shitom jong utei u nongmihkmat u la lap ban pynïoh biang ïa ka Public Health Centre ka jaka sumar kaba la jah rngia ha ki snem ba la dep bad ïa katei ka PHC yn s sdang noh shen ban pyntrei.
Nalor katei ka PHC u la pynioh ruh ïa ka mang pisa na ka bynta ban pynthymmai ïa ka PWD guest house bad ka Veterinary hospital.
