Ka long kaba shisha ba don ka jingduna ki doktor bad ki nurse ha ki hospital sorkar : Wailadmiki

Shillong, Rymphang 17 : U Myntri ka Koit ka Khiah u Ma Wailadmiki Shylla ula ong ka long kaba shisha ba ka don ka jingduna jong ki doktor bad ki nos ha ki katto katne ki hospital Sorkar, haba kdew ïa ka daw na ka jingnang bun ki nongpang ha kine ki lai snem ba la leit noh.
Haba jubab ïa ka jingkylli ha ïing Dorbar Thaw Aiñ ha ka sngi Ba-ar, u Myntri ula ong “Ka don ka jingduna ki doktor bad ki nos ha ki katto katne ki hospital Sorkar bad ha kajuh ka por kala don ka jingkiew kaba jur bha ha ka jingwan sumar ki nongpang ha ki hospital Sorkar ha kine ki lai snem bala leit noh bad mynta u snem”.
Ula bynrap ba ka Directorate of Health Services (MP) ka la pyntreikam ïa ki kor peit bniah lyngba ka dashboard ban leh eiei halor kane ka kam.