Shillong, Rymphang 17 : Ka Meghalaya kan sdang ban pyntreikam noh ïa ka jingsiew tulop kumba la pynbeit ryntih jong ki nonghikai SSA bad Adhoc naduh ka 1 tarik Iaiong 2026 bad ka hap ban sei pisa tam sa 200 klur tyngka na ka pla tyngka ban siew ïa kane ka tulop, pyntip u Myntri Rangbah u Conrad K Sangma ha ïing Dorbar Thaw Aiñ ha ka sngi Ba-ar.
“Ngi ju pynlut 600 klur tyngka ïa ki nonghikai SSA bad Adhoc ha ki skul lower primary bad upper primary bad da kane ka rai ban pyntreikam ïa ka tulop ba la pynbeit ryntih (structured pay), ngi la ai ia ka jingkiew tulop ba 3 %” ong u Conrad.
“Ban pyntreikam, ka Sorkar kan hap pynlut haduh 800 klur tyngka shisnem. Kane ka rai kan long kat kum ka jingsiew ba la pynbeit ryntih, ka ban ai ïa ka jingsngew shngaiñ bad ka jingkiew tulop ïa ki nonghikai” ula ong.
Palat 23,007 ngut ki nonghikai la khmih lynti ba kin ïoh jingmyntoi, ong u Myntri Rangbah haba pynpaw ba ka dei ka rai kaba eh bha hynrei ka dei pat ka lynti ban weng ïa ka jingeh ki nonghikai.
U Conrad ula batai ba ka rukom pynïaid ïa ki skul ha Meghalaya ka dei kaba kyllaiñ bha ha ka thaiñ, namar ka jingdon bun jait ki skul- ki skul Sorkar, ki skul SSA, ki skul Adhoc ba pynïaid bun da ki Management Committee shimet.
“90 % ki skul adhoc bad deficit ki dei kiba long trai da ki riew shimet ym ka Sorkar. Ka Sorkar ka ju ai grant sha ki namar ba kim lah ban pynïaid ïa ki” ula ong.
Ha ka jingïaid ka por, kine ki grant ki la wandur kum ka tulop, kaba lam sha ka jingkhmih lynti ba ka Jylla kan siew lut ïa baroh.
“Ka dei ka jingkitkhlieh ba pura jong ka Sorkar ha ki skul Sorkar, hynrei ki skul adhoc ki dei kiba pynïaid da ki riew shimet. Watla katta, ngi sngewthuh ïa ka jingeh jong ki nonghikai” ula ong haba bynrap ba kane ka jingsiew tulop thymmai kan treikam tang ïa ki nonghikai SSA bad Adhoc kiba la ïoh katjuh ka tulop bad ba don hapoh ka FASTOM.
“Ngim shim don hangne ban shimti ïa ki skul” ong u Conrad haba jubab ïa ka jingkylli ba la wanrah da u Nongia lam ka Liang Pyrshah Mukul Sangma. “Ngi la wanrah ïa ka jingsiew tulop bala pynbeit ryntih kat kum ka jingdawa jong ki”.
ïa ki nonghikai deficit yn sa shong bishar la ka jong, ula bynrap.“Ki deficit ki dei sa kawei pat ka sienjam, ngi dang bishar ïa ka. Ngi kwah ban ïarap ïa baroh hynrei man ki rai ki don ki jingktah ïa ka pla tyngka. ïa mynta, ngi la pynbeit ïa ka kam jong ki adhoc bad SSA”.
U Conrad ula ïathuh ba ka Meghalaya, da ka jingdon palat 55000 ngut ki nonghikai bad 14000 tylli ki skul, ka mad ïa ka jingeh kaba pher bha haba ïanujor bad kiwei pat ki Jylla ka thaiñ Shatei Lam Mihngi.
