Shillong, Rymphang 17: U Myntri ka Pule puthi Bah Lahkmen Rymbui hynne ka sngi Ba ar ula ong ba ka Sorkar ka la pynïaid shakhmat ïa ki jingtyrwa siew tulop lyngba ka portal kaba khot Meghalaya School Information Management System (MegSIMS), ka ban pynduhjait ïa ka jingpynslem da kaba phah ïa ki jingtyrwa lyngba ki kot ki sla ne ki file.
Haba jubab ïa ka jingkylli na u MLA ka TMC u Dr Mizanur Kazi, u Bah Rymbui ula ong, ba kam don ka jingslem ban siew ïa ka tulop jong ki nonghikai sorkar hynrei ka la don ka jingslem ha kiwei pat ki kyrdan jong ki nonghikai.
“Ngi lah dep siew ïa ka tulop ki nonghikai haduh u Nohprah 2025,” ula bynrap.
Ula pynpaw ba ki la don ki daw jongka jingpynïaid ïa ki kam ki jam jong ka tulop bad ka sorkar ka la wanrah ïa ka rukom treikam kaba thymmai ban pynkloi ïa ka jingbhah.
Halor ka jingkylli, la ka tulop jongki nonghikai Adhoc bad ki nonghikai kiba ïoh ia ka Grant-in-aid la phah noh shawei, u Bah Rymbui ula kyntait da kaba ong,“Em, sir, kam don kano kano jingphah shawei ïa ka tulop. Ka tulop kaba dei jong ki nonghikai ka leit beit sha ki nonghikai”.
U Myntri ula pynthikna ba ka kynhun myntri ka la mynjur ïa ka rukom pynwandur ïa ka tulop nonghikai. “Ka jingeh jong ki nonghikai ka dei kawei na ki mat kaba heh. Nga ai khublei ïa u Myntri Rangbah bad ïa ka Kynhun Myntri kaba la ai jingmynjur ïa baroh ki kyrdan nonghikai kiba ïoh ïa ka grant-in-aid da kaba wanrah ïa ki hapoh jong kawei ka tnum” ula ong. Kane ka rukom pynwandur thymmai ïa ka tulop kan treikam naduh ka 1 tarik u Iaiong 2026.
U Bah Rymbui ula bynrap ba la phiah la ka jong ne ka Separate Budget Heads na ka bynta ka tulop bad ka rukom pynwandur thymmai ïa ka tulop ka dei da ka jingthmu pynbeit ïa ka jingbym ïaid ryntih kaba la bun snem.
“Tang kawei ka mat ka long ba mynta la bun phew snem ka jingpynslem ka lah don. Ban pynbeit ïa baroh kine, ka sorkar ka la pynmih da ka rukom treikam kaba thymmai ban pynsuk ïa ka jingmut jingpyrkhat ki nonghikai khnang ba kin ïoh ïa ka tulop ha ka por kaba biang,” ula ong.
U Nongialam ka Liang Pyrshah u Dr. Mukul Sangma ula pynpaw ba ka la don ka jingïapher hapdeng ki kyrdan. “Ngi donkam ban shim khia ïa kane ka jingïapher kaba jur bha bad ban ai ïa ka hok ïa kum kitei ki nonghikai” ula ong.
Haba pynshai halor kane, u Bah Rymbui ula ong ba ka sorkar ka la pynmih ïa ka Notification ha ka 12 tarik u Rymphang ban kyntiew ïa ka tulop ki nonghikai. “Ngi lah ithuh ïa ka jingnoh synniang ki nonghikai. Nga sngewnguh ïa u Myntri Rangbah ban wanrah ïa ka jingbiang ha ka rukom siew. Ngi lah pynmih ïa katei ka Notification, kan treikam naduh ka 1 tarik u Ìaiong 2026 kan pynduna ïa ka jjngeh jong ki nonghikai” ula ong.
