Kynnoh u bah Ardent ba ym ailad ka Sorkar ïa ka Liang Pyrshah ban wanrah bun ki mat jingïakren

Shillong, Rymphang 17 : U President jong ka VPP kaba don ha ka Liang Pyrshah bad MLA ka Nongkrem u bah Ardent Miller Basaiawmoit u la kynnoh ba ka sorkar jylla kam ailad ïa ka Liang Pyrshah ba kin wanrah ïa ki mat jingïakren kiba ktah ïa ki paidbah.
“ Ngan kren hok ïa phi ba ki paidbah ki la ïohi kumno kane ka sorkar ka leh ha kaba pynïaid ïa ka ïing dorbar bad ki paidbah ruh ki sngewthuh ba ki Liang Pyrshah kin ym ïoh lad ban wanrah ïa kita ki mat kiba ktah ïa ki paidbah ong u bah Ardent haba ïakren bad ki nongthoh khubor mynta ka sngi hadien ba u Lamphang um shym ailad ban ïatai halor ka jingjia ba dang shen kata ka jingbthei ka par dewiong. U Speaker pat u pynpaw ba kane ka kam ka don hapoh ka ïing Bishar bad hapdeng ka jingtohkit jong u Nongbishar ba la shongthait kumta ym lah ban ïakren hapoh ka ïing Dorbar Thawain.
U la ong wat hapdeng ki jingpyrshang ban bud ïa ki kyndon pynïaid ïing Dorbar ruh ym shym la ailad satia ban ïakren hapoh ka ïing Dorbar.
“ Ngi la pyrshang ban ngi la ïaid ruh kat kum ki kyndon pynaïaid ïing Dorbar bad ngim kwah ban ïaid lait palat ia kata bad ki paidbah ruih ki ïohi bha ïa kata kumno kane ka sorkar ka leh” ong u bah Ardent.
“ Don ka por ïakiei kiei baroh bad ki paidbah ki la dep bishar lypa ïa ki kam kane ka sorkar” u la pynkut.