Shillong, Rymphang 17 : U Myntri ka Tnad Excise u Brening A Sangma ula pyntip ha ïing Dorbar Thaw Aiñ ba phra tylli ki karkhana kyiad bad kawei ka karkhana Ethanol, kiba treikam ha Jylla.
“Ka jingdon ki liquor unit ka long phra tylli bad ka ethanol unit ka long kawei” ong u Sangma haba jubab ïa ka jingkylli bala wanrah hapoh ka ïing Dorbar ha ka Sngi Ba-ar.
Ula pyntip ba ki jingdih kiba la pynmih hi na Jylla lyngba ki bottling, brewery bad distillery unit ki kynthup ïa ka Vintage Cask Matured XXX Rum, Ember Gold Reserve Whisky, Cherrapunji Eastern Craft Gin, Cherrapunji Eastern Craft Gin bad Sohiong Berries.
