Khlem ai lad u Lamphang ban ïatai halor ka jingbthei ka krem dewïong ha Mynsngat-Thangsko

Shillong, Rymphang 17: U Lamphang ka Ïingdorbar Thaw Assembly u Thomas A Sangma ha ka sngi Ba-ar u la kyntait ïa kano kano ka jingïakren halor ka jingbthei par dewïong beain kaba la jia ha Mynsngat-Thangsko dang shen, da kaba ong ba ka rai jong u ka dei kaba khatduh bad kaba la ïalam da ki kyndon.
“Nga la ioh pdiang ba kane ka kam ka long sub judice bad ka dang sahteng ha ka iing bishar, bad katkum kane nga la shim ia kane ka rai katkum ka Rule 57, sub-clause 6.Nga ieng ha ka rai jong nga, bad ka rai jong u Lamphang ka long kaba khatduh,” la ong u Sangma da kaba bynrap ba u myntri rangbah u la dep ban ai ïa ka jingkren suo-motu ha kaba ïadei bad kane ka jingjia.
Haba ïa dei bad katei ka kyndon, u nongthaw ain ka liang pyrshah jong ka VPP u bah Ardent Basaiawmoit na Nongkrem u la kynthoh ba ïa ka kyntien “sub judice” la pyndonkam bunsien da ka bor synshar khnang ban lait na ka jingïatainia.
“Kum ki nongthaw ain jong ka ïing dorbar thaw, ngi don ka jinglaitluid ban kren ïa (ki mat kiba ngi sngewkhia).Wat ki ïing bishar hi ki la rai ba ym khang ia ka jingïakren ki nongthaw ain (tang namar ba kano kano ka kam ka dang sahkut ha khmat jong ki),” u la ong.
“Ngi tip ba ngim lah ban ïakren ia ka jingbakla ne jinglong ba lui lui, ki jinglap jong ka iingbishar – hynrei ngi lah ban ïakren ïa ka jingbymlah trei kam ha ka liang ka jingsynshar bad ki jingbakla jong ki polisi khnang ba kin lah ban khanglad.Ka bor synshar kam dei ban rieh ïa lade ha lyndet jong kane ka provision jong ka sub judice.”
U bah Basaiawmoit u la kyntu ba dei ban ailad ïa ki dkhot ba kin ïamir jingmut halor ka jingbthei ka krem dewiong ha Mynsngat-Thangsko.
“Ki paidbah ka jylla ki kwah ban tip kaei kaba la pynlong ïa katei ka jingjia kaba sngewsih bad ïa ka kam kaba ïadei bad ka jingtih dewiong beain ha ka jylla.”
U nongïalam ka liang pyrshah u Dr Mukul Sangma u la kyrshan ïa kane ka jingdawa, da kaba ong ba ka jingai jingmut jong u Basaiawmoit ka long kaba “ïadei bha.”
U la ong ba ka sorkar ka dei ban ujor sha ka ïingbishar ban bishar kyrpang ïa kane ka case, ym ban pynïasoh lang bad ka PIL.
“Kane ka mukotduma kaba kyrpang, bad ka jingkitkhlieh jong ki bor synshar ban shimkhia…ka la dei ban shah bishar kyrpang da ka sorkar.Lym kumta, kano kano ka jingjia kaba be-aiñ yn lum lang ha kawei ka PIL,bad yn shim ïa ka kum ka rukom treikam ban pynmih ïa ka jingpynslem.”
Hynrei u Lamphang u la kyntait ban plie biang ïa katei ka mat.”Ngin nym ïa kren shuh ïa kane, namar nga la shim ia ka rai jong nga”, u la ong da kaba pynkut noh ia kane ka kam.