Shah kynnoh leh donbor u Rangbah Shnong bad u SI ka SDEO ba pynkynriah ïa ka skul LP ha Mawrapad

Shillong, Rymphang 17: Ki riew rangbah jong ka shnong Mawrapad, ka shnong kaba don sharum jong ka Mawsynram kila kynnoh ba u Rangbah Shnong bad u SI jong ka tnad SDEO kiba don ka jingïadei sop sop kila pynkynriah noh jubor ïa ka skul Lower Primary sha ka ïing Dorbar jong ka shnong.
Haba ïa kren bad ki lad pathai khubor u Bah Pynshongdor Shangdiar kane ka jingpynkynriah jubor jong kine ki ar ngut ba kynthup ïa u Bah Kyrmen Shangdiar kum u Rangbah Shnong bad u Bah Peter Sun uba dei u SI jong ka tnad SDEO ka Mawsynram, kala long ka jingduh nong ba khraw ïa ki khynnah skul namar ba kim ïoh shuh ïa ka ja sngi ne ka mid day meal.
U Bah Pynshongdor u la kynnoh ba kane kadei ka jingleh donbor jong u Bah Kyrmen kum u Rangbah Shnong.
Halor kane, u Bah Pynshongdor u la ïathuh ba la ïa kren ïa kane ka kma hapoh ka dorbar bad ki paidbah ba bun kim pdiang satia ïa kane ka rai bad kila thmu ban shu mih jyndat napoh ka dorbar hynrei u Rangbah Shnong u la byrngem ban sahin kuna ar shah lada ki mih bad khlem soi ia ka bui.
Wat tang ban kit ïa ki dieng ne ki maw na ka raid lan, u Bah Pynshongdor u la pyntip ba ki donkam ban ïoh shwa ka jingmynjur na ki paidbah nong shong shnong jong ka shnong Mawrapd kaba hapoh ka Hima Mallai Sohmat.
Shuh shuh u Bah Pynshongdor u la ïathuh ba hapoh ka shnong Mawrapd mynta lah 40 snem ym ju don shuh ka skul shnong hadien ba ïa kane ka skul LP la aiti sha u wei u briew ban pyniaid ia kane ka skul.
Kumba long mynta la shet ïa ka ja bam sngi ki khynnah la shet ha ïing u Rangbah Shnong bad u la pynkylla noh ïa ki nongïalam jong ka Managing Committee bad kine baroh kila ktah ïa ki khynnah skul.
Halor kane kila dawa na ka sorkar lyngba ka tnad pule puthi ba kin weng kam noh ïa une u SI uba la tip kyrteng kum u Bah Peter Sunn bad kumjuh ruh ki la ai jingthoh sha u CEM ka KHADC halor u Rangbah Shnong.