Shillong, Rymphang 17 : U Maj Gen Jai Singh Bainsla, SM ha ka sngi Ba-ar u la plie pyrda ïa ka lympung ïalehkai jong ka Assam Rifles Sentinels Cup Football Tournament (Men & Women) 2026 kaban neh haduh ka 27tarik mynta u bnai da ka thong ban kyntiew ïa ka jingïalehkai bad wanrah ka jingïatylli ha ka imlang sahlang ha ka thain baroh kawei.
Ïa kane ka lympung ïalehkai kaba la buh ban sdang naduh ka 17 tarik u Rymphang haduh ka 27 tarik u Rymphang 2026 yn pynlong ha kylleng ki jaka ha nongbah Shillong. Ïa ki jingïalehkai league tad haduh ka semifinal yn pynlong ha madan phutbol Nongkrem bad ha madan Assam Rifles Laitkor, katba ïa ka phainal jong baroh ar ki kyrdan jong ki shynrang bad kynthei yn pynlong ha madan SSA, Polo, ha ka 27 tarik u Rymphang 2026.
Haba phai sha ka jingïakhun sdang jong kane ka lympung ha ka liang ki kynthei, ka kynhun jong ki thei ka Assam Rifles ka la pynliem haduh 5-0 kol ïa ka kynhun jong ka Laitkor FC.
Kane ka lympung ka pyni bad pynshongshit ruh ïa ki nongpeitkai khamtam haba ka jingïalehkai ka long kaba itynnad khamtam lei lei haba sakhi ïa ka jingtbit jong ki thei ïalehkai ka Assam Rifles.
Mynta ka kynti, ki kynhun ïalehkai na kylleng jong ka jylla kynthup ïa ka kynhun na Assam Rifles, Indian Army bad Meghalaya Police ki shim bynta ha kane ka lympung. Baroh ki la don phra tylli ki kynhun ha ka liang ki shynrang bad 8 tylli pat ha ka liang ki kynthei kiban aireng ha ka jingïakhun kaban pynlong ha ka dur jong ka league-cum-knockout format bad buh pat ba ïa ka final yn pynlong ha ka 27tarik ha madan SSA Polo.
Ka kyrwoh ka pyntip ruh ba ka kynhun kaba ïoh ban rah ïa ka nam lahduh ha ka liang ki shynrang bad kumjuh ha ka liang ki kynthei kin ïoh ban khur ïa ka song pisa kaba 3lak tyngka ryngkat bad ka khusnam Assam Rifles Sentinels Cup Trophy. Ha kajuh ka por ka kynhun kaba wan ba ar pat kan ïoh rah ïa ka song pisa kaba long 2lak tyngka.
Ka kyrwoh ka ong ruh ba lyngba ka jingsoi ïa ka soskular bad ka Bhaichung Bhutia Football Academy bad kiwei ki sienjam kum ka Assam Rifles Public School (Sports), ka Assam Rifles ka kylla long ka shlem ban ithuh bad pynjanai ïa ka sap ïalehkai phutbol ha ka thain baroh kawei. La ong ruhba kine ki lympung ki ïaid ryngkat ryngkat bad ki sienjam jong ka Ri kata kum ka Khelo India Abhiyan bad ka Fit India Movement, kaba don ïa ka thong ban kyntiew ïa ka jingïalehkai ha ka Ri.
