Lajan kot 3 hajar tylli ki kam pulit ba lait ladep thungkam ka sorkar jylla, ïathuh u Lat

Shillong Rymphang 16: Ka Sorkar Jylla ka la ïaid shaphrang ban pyndep noh ïa ka jingthungkam ha ki 3000 tylli ki kam ba lait ha ka tnat pulit, ong u Lat ka jylla ha ka sngi sdang ka Dorbar Mang Tyngka ha ka sngi Nyngkong.
U la ong, “Ngi shim ïa ka jingkitkhlieh ban pynkhlaiñ ïa ka tnat pulit, ka jingpynrung kam jan kumba 3000 tylli ki kam kiba lait kadei kaba lah jan pyndep.
U Lat CH Vijayashankar u la ong, “Ka jingthmu kaba hakhmat jong ka sorkar ka long ban kyntiew ïa ka jingsuk, jingshngaiñ bad ïa ka bha ka miat jong ki nongshong shnong. Ha u snem ba la dep, ka jinglong jingman ha ka jylla ka la long kaba shongsuk shongsaiñ, la ong u Lat bad ka bynrap ba baroh ki tamasa kynthup ïa ki jingrakhe hapoh ka ri bad ki jingrakhe ha ka jylla kidei kiba la ïaid beit da ka jingsuk.
Shuh shuh u Vijayashankar ula ong, ba ka jingpynbiang ïa ka jaka sah ki pulit kadei kaba la pynïaid shakhmat. “Ngi kut jingmut ban pynkhlaiñ ïa ka tnad pulit ka jong ngi, ka jingpynrung kam ïa jan kumba 3000 tylli ki kam kiba lait kadei kaba lah jan dep artad,” ula bynrap.
Ha u snem ba la dep, u Lat ula ong, ba bun ki jingtyrwa ban pynkhlaiñ ïa ki jingtei jong ki pulit kidei kiba la shimkhia hapoh jong ka Police Infrastructure Renovation Fund.
Ka jingtei ïa ki 14 tylli ki Police Housing Project ka la ïaid beit bad kane kan pynkhlaiñ ïa ka jingai jingshakri jong ki pulit ha kylleng jong ka jylla, ïathuh u Lat.