`115 klur sha GHADC bad `27 klur sha JHADC pynïoh song jingïarap pisa ka sorkar, pyntip u Lat

Shillong, Rymphang 16: Ka Sorkar jylla ka la ïaibteng ban ai ka jingkyrshan ïa baroh 3 tylli ki Autonomous District Council kiba don ha ka jylla ba kin lah ban pyndep pura ïa la ki jong ki jingtreikam bad ka roi ka san kaba don ka jingkitkhlieh.
Ïa kane la ïathuh da u Lat ka jylla ha ka sngi sdang ka Dorbar Mang Tyngka ka jylla ha ka sngi Nyngkong bad ong ba hapoh ka Digital India Land Records Medernization Programme, la sdang ïa ki jingjurip jaka ha kiba bun ki shnong ha kylleng ka jylla kiba la pynïaid ruh da ki 3 tylli ki Autonomous District Council.
“Kane ka prokram kan pynkupbor ïa ki District Council haba ïadei bad ka khyndew ka shyiap bad ki kam pynmih khajna,” ong u Lat.
Ban pynbeit ïa ki jingeh halor ka pisa pilaiñ ha ki District Council, ka jingïoh ïa ki jaka bad ka jingpynïaid halor ki kam pisa, u Lat u la ïathuh ba ka sorkar ka la thaw ïa ka State Level Committee bad ka District Level Sub Committee.
“Ka GHADC bad JHADC ki la dep pdiang ïa ka jingmynjur ïa kine ki committee bad halor kane ka sorkar ka la pynïoh ïa ka song pisa ne ka bailout package kaba long T. 115 klur sha ka GHADC bad lah jan T. 27 klur sha ka JHADC ban pynkhuid ïa ka jingsiew tulop bad ki baibam tymmen (pension). Kane ka pisa la pynlait kum ka jingsiew lypa ïa ka bhah sam khajna jingmih halor ki marpoh khyndew bad la pynlait ruh sha ki account,” ïathuh u Lat.