Ïoh jingmyntoi ki 220 ngut na ka Awareness Program – cum – Medical Health Camp ha Shnong Nungraw

Mawkyrwat, Rymphang 16 : Ki 220 ngut na ki san (5) tylli ki shnong ki la ïoh jingmyntoi shibun na ka Awareness Program – cum – Medical Health Camp ba la pynlong da ka Lawei Bankyrshan Multipurpose Co-operative Society Mawlangwir Cluster ha ryngkat ka jingïatreilang bad ka ophis jong u District Medical & Health Officer, South West Khasi Hills District lem bad kiwei de ki tnad treikam jong ka sorkar ha shnong Ngunraw hapoh ka Community Hall ka shnong kaba jngai kumba 26 – kilometre na Mawkyrwat.
Lah ban kdew ba ki 5 tylli ki shnong kiba la ïoh jingmyntoi na kane ka Awareness Program cum Medical Health Camp ki long ka shnong Ngunraw, Rangjadong, Kensimphlang, Mawlieh, bad Mawlar. Ym tang kata, ha kane ka sngi, ka la don ruh ka jingpynrung kyrteng ha ka Aadhaar ki don 32 ngut, ha ka ABHA 15 ngut, ha ka MHIS 21 ngut, ha ka ANC 3 ngut, ha ka NCD Screening 22 ngut, kiba shim dawai na ki doktor kynthup na ka OPD bad Ayush ki don baroh 119 bad kiba wan ai tika khyllung ki don 8 ngut.
U kongsan ha kane ka program u dei u Dr. B. Lyngdoh, Medical & Health Officer bad haba pynbud ïa ka jingkren ula pynpaw ka jingaikhublei na ka bynta ki paidbah jong ki san tylli ki shnong kiba la wan lang ha kane ka program kaba long kawei na ki lad ban jingïarap ban pynpoi ïa ka jingshakri lyngba ka jingkoit jingkhiah ha ki shnong ki thaw. Kumta, ula buh ka jingkyrpad ïa ki paidbah haba don kum kine ki program kim dei ban pynleh noh ei hynrei ki dei ban shim kabu khnang ba kan long ka jingïarap bad jingmyntoi ïa ki hi kum ki paidbah.
Kiwei de ki nongkren ha kane ka sngi ki kynthup ïa ka kong Rila-akorlin Kharlyngdoh, BPM, BMMU, Mawkyrwat ka la kren ïa ka mait phang jong ka jingpynlong ïa kane ka Awareness Program cum Medical Health Camp, ka kong S. Marweiñ, Supervisor Rangthong PHC, ka la kren ïa ka phang, “Ka koit ka khiah ki kynthei bad ki khyllung khynnah”.
Nangta, bud sa jingkren na ka Dr. A. Shylla, Ayush, Medical & Health Officer, bad na ka kong Queency Kharmawlong, Deputy Chief Legal Aid Defense Counsel, District Legal Services Authority.
Ïa ka jingïalang la pynïaid da ka President jong ka Tylloilum Village Organisation, ka jingkren lyngkot na ka kong Phuhsyntiew Kharlyngdoh, Vice – President ka Lawei Bankyrshan CLF bad jingkren khublei na ka kong Iadashisha Nongmor, Secretary ka Sdohktoilum Village Organisation Rangjadong.