SCA Cricket League Super Division 2026: Pynliem ka Langsning ïa ka Nongthymmai; Kamai spah ron u Nishanta

SHILLONG, Rymphang 16: Ka Langsning Cricket Club ka la pynliem noh da 56 ron ïa ka Nongthymmai Cricket Club ha kawei na ki jingïakhun jong ka lympung Shillong Cricket League Super Division 2026 ba la pynïaid da ka Shillong Cricket Association (SCA), kaba la long hynne ka Lah Sngi U Blei.
Haba tied nyngkong hadien ba jop ïa ka jingkynting pisa (toss) ka Langsning ka la kamai 272 ron bad hap 6 wiket haduh kaba kut jong ki 45 ober, nangta ka la khanglad ïa ka jingpyrshang jong ka Nongthymmai, da kaba ailad tang 216 ron bad pynhap 9 wiket haki 45 ober.
Kiba la lamkhmat bad trei borbah ha ka pali tied jong ka Langsning ki kynthup ïa u Nishanta Chakraborty, uba la kynjoh tam ïa ka spah ron hadien ba u la kamai 117 ron naki 82 bol, katba u Riboklang Hynniewta u la noh synñiang 55 ron naki 61 bol.
Napdeng ki nongkawang bol kiba kham seisoh jong ka Nongthymmai ki long u Badonamjohn Mylliemngap (khur 2/40 naki 5 ober) bad u Ram Najiar (khur 2/47 naki 9 ober). Nangta kiba la kham pawkhmat ha ka tied ki long u Sandeep Chanda (64 ron naki 100 bol) bad u Anmol Sunar (55 ron naki 65 bol).
U Riboklang Hynniewta (khur 3/41 naki 7 ober) bad u Aaron A Nongrum (khur 2/29 naki 9 ober) ki long ki ar ngut ki nongkawang bol ba seisoh tam ban pynthikna ïa ka Langsning ban khur ïa ka jingjop.
Na ka bynta ka spah ron kaba u la kamai, u Nishanta Chakraborty u la ïoh ban khur ïa ka khusnam Player of The Match.