Shillong, Lber 22: Kum ka dak ka jingieit bad ka jingai mynsiem bad kyrkhu kyrdoh, u Bah Sanbor Shullai, MLA uba dei ruh ha kajuh ka por u Chairman jong ka Monitoring cum Implementation Committee jong ka 19 South Shillong Constituency, u la ai jingïarap lyngba ka financial assistance jong u snem 2022-23 kaba 50,000 tyngka sha ki khynnah ïalehkai Wushu jong kane ka thaiñ.
Kine ki khynnah kynthup shynrang bad kynthei na ka South Constituency, kila shah jied ha ka Institution of Meghalaya Wushu Association (MWA) hapoh ka jingïalam u Bah Donny Ranee ban leit mihkhmat ïa ka jylla sha ka lympung ïalehkai Wushu kaba la tip kum ka 21st Sub-Junior National Wushu Championship kaban sdang naduh ka 25 tarik haduh ka 30 tarik Lber 2022 ha Noorul Islam University, Kumarakoil Thukalay, Nagercoil Kanyakumari District, Tamil Nadu. Ïa kane ka lympung la peit bad khmih da ka Wushu Association of India (WAI).
