Shu kular kai u Myntri ka tnat Pule Puthi ïa ki nonghikai SSA, 20 sngi ym pat ïoh tulop

Shillong, Lber, 22: Watla u Myntri ka tnat Pule Puthi ka Sorkar Jylla u Bah Lahkmen Rymbui u la khlei ïa ka kular hakhmat ki nongïalam jong ka Meghalaya SSA School Association (MSSASA) ha ka 2 tarik mynta u bnai ban pyllait noh hapoh shitaiew ïa ka tulop ba tang ar bnai jong ki nonghikai skul SSA hynrei kumba ka paw mynta, kane ka jingkular kam shym la poi shaei shaei ruh namarba watla 20 tylli ki sngi ki la ïaid, ki nonghikai kim pat ïoh pdiang satia ïa ka tulop.
Ha ka jingïalang bad ki nongïalam jong ka MSSASA u Myntri ka tnat Pule Puthi u la kular ban pyllait noh ïa ka tulop tang na ka bynta u bnai Risaw bad Naiwieng, 2020.
“Ka jingkular jong u Myntri ka tnat Pule Puthi ha ka jingïakren ha ka 2 tarik mynta u bnai ka long ban pyllait noh ïa ka tulop hapoh shitaiew hynrei mynta la ïaid la arphew sngi, ka pisa ka dang sahkut hapoh ka tnat Pla Tyngka jong ka Sorkar,” ong u President MSSASA u Bah Aristotle Rymbai ha u kyrwoh ba la phah sha ki lad pathai khubor.
“Ka jingkular jong u Myntri ka tnat Pule Puthi ka dei tang ka buit ban shu pynslem bad ban pynjem ïa ka jingbitar jong ki nonghikai skul SSA kiba mih sha surok ha kato ka sngi,” la kynthoh u Bah Rymbai.
“Ngi dawa ïa la ka jong ka hok. Hato shi pyrkhat lem ban im san bnai khlem ka tulop kam dei ka kamkai. Wat lehkai bad ngi bad ngi don hangne ban shakri ïa ka jylla bad ban shakri ïa ki khynnah skul jong ka jylla Meghalaya,” ong u Bah Rymbai/.
“Wat pynbor ïa ngi ki nonghikai ban mih sha surok ryngkat bad bahahing hasem. Sngewbha wat pynbor ïa ngi ban leh ïa kane namarba ngi kwah ban pynleit jingmut bad ban pyndep ïa ka la kamram,” u la ong.
“Ngi kwah ban phah ïa u kyrwoh uba shai sha ka Sorkar Jylla snewbha ban pynlait noh ïa ka tulop kaba ar bnai kumba la kular da u Myntri ka tnat Pule Puthi,” la ïaiban une u nongïalam ka Seng.
Haba ïathuh ba ka seng kam shym la shong kli kti hynrei ka la ïai buddien na ka Sorkar, u Bah Rymbai u la ong, ‘ha ka 10 tarik mynta u bnai ngi la leit ïakynduh ïa u Secretary jong ka tnat Pule Puthi u Ambrose Ch. Marak ha kaba u la pyntip ba ka jingpynslem ka dei na ka daw ka jingdon jong ka Dorbar Mang Tyngka bad ba ki ophisar ki hap ban leit sha Ingdorbar Thawaiñ. Hynrei mynta pat ba la kut ka Dorbar Mang Tyngka balei pat ki dang pynslem bad balei ym shym la leh eiei.”
“Hynnnin ka lah sngi u Blei nga la kylli ïa u Secretary jong ka tnat Pule Puthi u Ambrose Ch. Marak, u la pyntip ba ka File ka dang ïaid. Mynta la 20 sngi ka File ka dang ïaid? la buh jingkylli une nongïalam ka MSSASA.
“Ka MSSASA ngi phah ïa u kyrwoh uba shai sha ka Sorkar MDA, lada kam pyllait noh ïa ka tulop ba sahteng na ka bynta ar bnai kynthih kumba la kular da u Myntri ha ka 2 tarik mynta u bnai, ha ka 25 tarik tarik mynta u bnai ngin sa khot ïa ka jingïalang kyrkieh bad ngin sa shim ïa ka rai ban pyrshah ïa ka jingleh kuman jong ka Sorkar MDA,” la maham une u nongïalam ka MSSASA.