Mynta yn ïakynduh ka MDA halor ka Election President, lah ban wanrah ïa ka kam jong u Bah Sanbor ruh

Shillong, Naitung 11 : U Myntri Rangbah ka jylla uba long ruh u Chairman jongka Meghalaya Democratic Alliance (MDA) u Conrad K Sangma u la khot ïa ka jingïalang lashai ka Sngi Ba Ar ha ïing jongu haka por 7 baje ban ïakren halor ka Election jied President ka ri la kin ai ka jingkyrshan ba pura ïa ka kyrtong ka NDA kaba dei ruh ka riewlum na Odisha ka Draupadi Murmu. Nalor kane u Myntri Rangbah u lah ruh ban wanrah ïa ka mat jingïakren ha kaba ïadei bad ka jingjia ha Orchid Lake Resort ha ka 6 tarik ha kaba u bah Sanbor Shullai u la pynwit ïa ka jingkren jong u Lamphang bad Presient ka UDP u bah Metbah Lyngdoh halor ka jingshah thombor ki riewlum rit paid ha kylleng ka ri India.
Namar na ka liang u Myntri Rangbah u la dep kular ba un leh ei ei halor kane ka jingleh khlem akor jong u bah Sanbor ban pynthut ïa u Lamphang hakhmat ka kyrtong President ka NDA ba la ïadonlang ruh da kiwei ki myntri ka sorkar NDA bad ki nongïalam ka BJP ruh na shabar ka jylla. U Myntri Rangbah u lah ban wanrah ha ka MDA ne u lah ban shim ïa ka rai haka por kaba dei eh kumba ula dep pynpaw ha ki nongthoh khubor ha ka jingïakren bad u ha kine ki khyndiat sngi.
Na ka liang u Myntri Rangbah ula dep ïakren bad baroh ki nongïalam jong ki seng saiñ pyrthei kiba ïa synrop lang hapoh kane ka sorkar MDA ban ïa tylli bad kyrshan pura ïa ka Draupadi ha kane ka election ka ban long ha ka 18 tarik mynta ubnai.
Ka MDA lashai ka sngi kan sa ïakren lada donkam ban ai ruh da ka Whip ne da u shabuk sha baroh 48 ngut ki MLA jongka kynthup ïa ki san ngut ki MLA ba shah sospon ka Congress kiba kyrshan ïa ka MDA. Ha ka jingshisha na ka liang ka NPP, UDP, HSPDP , PDF ki la dep pynpaw lypa ba kin kyrshan ïa ka Murmu khamtam ba ka dei ka riewlum ba nyngkong eh ka ban sa kiew sha katei ka shuki.
Na ka liang ki 5 ngut ki MLA ba la shah sospon ka Congress ha kaba nyngkong ki pynpaw ba kin kyrshan ïaka Murmu namar ka dei ka riewlum hynrei ki la pynpaw ka jingsngewdiaw hadien ba ka BJP ka khlem khot ïa ki sha ka jingïalang ba la lum ha Orchid Lake Resort ha ka 6 tarik ha ka jingwan ka Murmu sha ka jylla ban pan jingkyrshan na baroh ki MLA bad MP.
Uwei napdeng ki san ngut ki MLA ba shah sospon ka Congress u bym kwah ban pynpaw kyrteng u la ong namarba ka BJP ka la khot sngewbha ïa baroh ki MLA kiba don ha ka MDA kumta kin burom ïa kaei kaei ka rai jongka MDA ban kyrshan ïa ka kyrtong ka NDA.