La pynkut noh ïa ki jingïalehkai hapoh ka Unity Utsav jong ki samla pule ka thaiñ shatei lam mihngi

By Mawphor Editor On Feb 12, 2026

New Delhi, Rymphang 11: Ka sngi kaba lai bad kaba khatduh jong ka lympung ïalehkai hapoh ka Unity Utsav 2.0 ka la kut noh da ka jingpyni sap, ka jingkut jingmut, bad ka jingïatylli na ki nongïashim bynta ha baroh ki jait jingïalehkai ha Delhi Cantonment.
Kane ka sngi ka la khring ïa bun ngut ki paidbah kiba la tuid sha madan ban sakhi ïa ki jingïalehkai bad ban ai jingkyrshan ïa la ki jong ki kynhun.
Ki samla ki la pynpaw ïa ka mynsiem ïalehkai bad ka jingïatreilang da kaba wanrah ïa ka jingïalehkai kaba jur bha ha ka phainal ha ka Phutbol, Basketball, Volleyball, Table Tennis, bad Badminton, kaba pyni ïa ka jingaiti lut, ka jinglong ryntih, bad ka jingpynkhreh jong ki samla pule kiba ïashim bynta.
Da ka jingïashim bynta jong palat 1,000 ngut ki samla pule na phra tylli ki jylla ka thaiñ shatei lammihngi ha kine ki lai sngi, ka bynta ba ïadei bad ka kam ïalehkai hapoh ka Unity Utsav 2.0 ka la kut noh da ka jingjop.
Nalor ki takma bad ki khusnam sha ki nongjop, kane ka lympung ïalehkai ka la pynkhlaiñ ruh ïa ka jingïadei paralok, ka la pynjylliew ïa ka jingïasngewthuh jingmut, bad ka la pynskhem ïa ka mynsiem jong ka jingïatylli lyngba ka kam ïalehkai.
Ka jingpynïaid kaba jop ïa kane ka lympung ka la urlong lyngba ka jingkyrshan bad jingïarap jong ka Assam Rifles, kaba ka jingangnud jong ka ban kyntiew ïa ka jingïatylli bad ka jingïatreilang hapdeng ki samla jong ka thaiñ shatei lammihngi kalong kaba skhem.
Katba ka bynta jong ka kam ïalehkai ka la poi sha kaba kut, ka kam mynta ka ïaid sha ka bynta jong ka kolshor hapoh ka Unity Utsav 2.0, ha kaba yn don ka prokram kaba heh kaba ïadei bad ka kolshor ban pyni nam da ki samla pule kiba ïashim bynta kaba la buh ban pynlong ha ka 19 tarik u Rymphang ha Manekshaw Centre, New Delhi.
Ha kane ka prokram yn pyni ïa ki riti dustur ba riewspah, ka jinghiar pateng kaba khlaiñ, bad ki jingthrang jong ki briew na ka thaiñ Shatei Lammihngi, kaba wanrah ïa ki jingrakhe jong ka jingïatylli sha ka jingpynkut kaba biang bad kaba iphuh iphieng.