Bym phah ka sorkar jylla ïa ka UC ym pynlait ka sorkar pdeng ïa ka pisa na bynta ka bylla 100 sngi

Shillong, Naitung 11: U Bah Disparsing Rani uba dei u shakri paidbah ba paw jong ka jylla lyngba ka RTI, ha ka 11 tarik Naitung u la ïathuh ba ka jingbym pynlait ka sorkar pdeng ïa ka pisa sha ka sorkar jylla kaba kot kumba 600 klur na bynta ka skhim MGNREGA ka dei namar ka jingbym biang ki rukom phah Utilisation Certificate (UC) ha ka por kaba biang.
U Bah Disparsing u la ong ba kat kum ka jingtip kaba u la ïoh na ka sorkar pdeng bad sorkar jylla kumjuh u la shem ba ka pisa kaba ka sorkar jylla ka dei ban ïoh ka kot haduh kumba 600 klur tyngka na bynta ban siew ïa ki bai tiar bai tar ha ka jingpyntrei ïa kane ka skhim. Shuh shuh u la ïathuh ba ha ka jingshisha ka sorkar pdeng ka ju pynlait ïa ka pisa ha ki ar sien ha ka shisnem sha ka sorkar jylla.
“Ngi lap ïa ba bunsien ka khyllem noh ka jingpyntrei ïa kane ka skhim ka dei namar kito kiba ju ai ram sha ki VEC ïa ki tiar ki tar kim lah shuh ban kyrshan namar kim ïoh pisa da ki bun bun snem” ong u Bah Disparsing.
Shuh shuh u la ong lehse ba dei hadien ba u la wad jingtip lyngba ka RTI na ka sorkar India ba ka sa pynlait ïa ka pisa kaba kot 300 klur tam sha ka sorkar jylla.