Hadien 3 snem shimti biang u Salgira Marak kum u Director ka Printing & Stationery

Shillong, Naitung 11 : Hadien lai snem ba la ïakhun hakhmat ka ïing bishar ïa ka jingshah pynkynriah na ka kam Director sha ka kam Officer on Special Duty (OSD) u Salgira Marak u la shah thung biang kum u Director jongka Printing and Stationery bad u la shimti biang ïa katei ka shuki naduh mynta ka Lah Sngi U Blei.
ïa kane ka hukum ban wanrah biang ïa u ha katei ka shuki la pynmih da ka Secretary jong kane ka tnad ka Kong Matsiewdor War ha ka 6 tarik Naitung 2022 kum ka jingpyndem ha ka hukum jong ka ïing bishar High Court jongka jylla kaba la pynmih ha ka 7 tarik u bnai Jylliew 2022.
U la ïathuh “ Mynta ba la thung biang ïa nga kum u Director jongkane ka tnad ngan ym leit ujor shuh sha ka ïing bishar ne ujor da ka Contempt of Court Petition kaba u la thmu ban leh haka 6 tarik Naitung 2022.
“ Ka long ka jingsngewhun bad sngew sting ïa nga shimet hadien ba la ïai ïakhun la lai snem lynter da ka mukotduma ba nga la jop bad ïoh biang ban shimti ïa kane ka kam namar ka sorkar ha kaba khatduh ka la pdiang ïa ka hukum jongka ïing bishar ban wanrah biang ïa nga kum u Director ka Printing and Stationery” ong u Salgira.
U la ong ba kam don jingmyntoi shuh ban dang bteng ban leit sha ïing bishar namar ka sorkar ka la pyntreikam ïa ki hukum ka ïing bishar da kaba la wanrah biang ïa u ha kane ka shuki Director.
“ Ha ka jingshisha nga la pynkhreh ban ujor biang sha ka ïing bishar da ka contempt of court ne jingbym kohnguh ïa ka hukum ka ïing bishar ha ka 6 tarik hynrei ha ka por janmiet nga la ïoh pdiang noh ïa kane ka hukum ba la thung biang ïa nga kum u Director kumta da kane ka juh ka hukum nga la ai kopi sha ka ïing bishar khnang ba ka ïing bishar kan tip ba ka sorkar ka la pyntreikam ïa ki hukum jongka.
U la ïathuh naduh ba mih ka hukum haka 7 tarik u Jylliew ula pyrshang ban leit sha ophis hynrei haba la poi ha kamra jongu u la lap ba la khang tala kumta u hap ba shong habar.
“ Hadien ba nga la shu ïai ap shibnai lynter da ka jingbym banse nga la pynkhreh ban leit ujor biang sha ka ïing bishar hynrei mynta pat ba la thung ïa nga ngan ym leit shuh” ong u Salgira.
Ka ïing Bishar High Court ka la pyndam ïa ar tylli ki hukum jongka sorkar lyngba katei ka tnad kata ka jingpynmih ïa ka post Officer on Special Duty (OSD) (Technical) ha ka tnad Printing bad Stationery bad kaba ai ka jingpynkynriah ïa une u Director sha katei ka post ba thymmai.
Nalor kata ha ka jingïasaid la pyrshang ban wanrah da ka tnad ïa ki jingkynnoh pyrshah ïa u Salgira kum kata ka jingbamsap da kaba kynnoh ba ka la mih ha ka CAG Report katba ka jingshisha kam pat dei ka CAG Report hynrei ka dang dei tang ka jingpan jingkheiñ jingdiah Audit Report na katei ka tnad bad kam pat don kano kano ruh ka jingrai pynrem ne ka jinglap ba don kata ka jingbamsap. Ka daw ba ym pat ïoh ai jingkheiñ ka long ba um don ha ka shuki hynrei mynta ba u la wan phai un sa pynbiang lut ïa ki jingkheiñ jingdiah kat kum ka jingkwah ka Audit katei ka ophis CAG.
ïa ka hukum na ka ïing bishar la pynmih da u Nongbishar Justice H.S Thangkhiew hadien ba la dep bishar bniah ïa ka mukotduma u Salgira kaba u la pyrshah ïa kitei ki ar tylli ki notification ba la pynmih da ka tnad Printing and Stationery.