Shillong, Naitung 11:Ka Hynñiewtrep Integrated Terrestrial Organization (HITO) ha ka sngi Nyngkong jong ka 11 tarik Naitung ka la leit ban ïakynduh ïa u Lat ka jylla u Satya Pal Malik ban dawa ba u dei ban pynjari noh da ka Adminstrator Rule ha ki lai tylli ki District Council kiba don ha ka jylla namar ka jingbym biang ka kheiñ ka diah halor ka jingpynlut ïa ka pisa kaba ka sorkar pdeng ka la mang na bynta jong ki.
U Bah Donbok Dkhar u President ka HITO u la ïathuh ba kane ka jingleit dawa na u Lat ka dei hadien ka jingbym lah ka KHADC, JHADC bad ka GHADC ka dei namar kim lah satia ban ai ïa ka jingkheiñ bad ki syrnot sha ka Comptroller and Auditor General ïa ka jingpynlut ïa ka pisa kaba kot kumba 265.58 klur kaba la mang ha u snem 2015-202 bad u la ïathuh ruh ba na ka liang u Lat ruh u la pynpaw ba na ka liang u Lat ruh u pynpaw ïa ka jingsngew mynjur ïa kane ka jingdawa jong ka HITO bad u la kular ruh ba un sa khot ïa u Myntri Rangbah ban ïakren sani halor kane ka kam.
Shuh shuh u la ïathuh ruh ba ka seng ka la dawa na u lat ban pynjah noh ïa ka jingdon ki seng saiñ pyrthei ha District Council hynrei ba dei ban thung dkhot beit da ki ki Syiem, ki Myntri, ki Sirdar, Ki Doloi, Wahadar bad ki Nokma.
U Bah Donbok u la ïathuh ruh ba ka HITO ka la pynkynmaw biang ruh ïa u Lat halor ka jingkyrpad na u ban un shimkhia halor ka ki jingdawa na ka ophis u Myntri Rangbahduh ka Ri ba un thung da ka komiti kyrpang ban khlieh da u Myntri Ka Tnad Poh ïing ka sorkar India ba dei ban pyntreikam noh ïa ki kyndon kiba ki Syiem Khasi ki la soi bad ka sorkar India ha ka Annexed Agreement ha u snem 1980. Haba ïadei kane na ka liang u Lat ruh u la ïathuh ba u la kular ban shimkhia ïa kane ka kam
