Shillong, Naitung 11 : Ki nongshng shnong jong ka shnong Langkyrding Mihngi ha ka sngi Saitjaiñ ki la pynlong ïa ka jingïalang paidbah bad ka jingsoi kyrteng ban dawa ba dei ban pynkynriah noh ïa ka Firing Range lane ka jaka kilan siat suloi jong ki shipai Border Security Force (BSF) kaba don hapdeng jong kane ka shnong.
Ha kane ka jingïalang la ïashim bynta da u MLA jong ka Pynthorumkhrah u Bah AL Hek, u MDC jong ka Mawkhar-Pynthorumkhrah u Bah Pynshngaiñ N. Syiem, ki dkhot jong ka Dorbar Shnong ryngkat bad ki paidbah nongshong shnong.
Katkum ka jingïathuh jong ki nongshong shnong, la ong ba kane ka jingdawa ban pynkynriah ïa kine ki shipai BSF ka dei namar ka jingsawa jong ki ktang suloi baroh arphew kynta kat haduh ba ka la ktah haduh katta katta ïa ka thiah ka dem jong ki paidbah wat ha ka por mynmiet.
U Rangbah Shnong jong ka Langkyrding Mihngi u Dr. B. Basaïawmoit u la ïathuh ba ha ka jingshisha ki Shipai ki la ïoh da kawei ka jaka ha Shilliang Umkhen hynrei ki dang ap ïa ka No Objection Certificate (NOC) na ka Khasi Hills Autonomous District Council (KHADC).
Ki paidbah nongshong shnong ki la ai por ïa ka District Council ba kan ai noh ïa ka NoC hapoh shitaïew khnang ban pynkynriah noh ïa ki shipai BSF napoh u pud u sam jong ka shnong.
U Bah AL Hek u la ïathuh ba na ka liang jong u, u ladep aiti ïa ka dorkhas ha u Myntri Khynnah barim ka tnat Kam Pohiing jong ka Sorkar Pdeng u Kirren Rijiju khnang ba un shimkhia halor kane ka jingdawa jong ki paidbah.
U la ong ruh ba u Rijiju u la ïakynduh ïa ki Ophisar jong ka tnat shipai BSF khnang ban pynkynriah noh ïa ki shipai sha ka jaka ba ladep thied thymmai.
