Shillong, Naitung 11: Ka Hynñiewtrep Youth’s Council(HYC) Shillong City ha ka sngi Nyngkong ka leit ban khynra Trading License ïa ki dukan ba shong da ki bym ki Khasi ha ki thaiñ Demseiñiong ban lap la kine ki dukan ki pynbiang ne em ïa ki kot ki sla kat kum ki kyndon aiñ, hynrei ka seng ka la hap ban sahngeh noh namar ka jingwan khang noh ki pulit.
Ha kane ka jingjurip ka seng ka la lap bun na kine ki dukan kiba shong da ki wei pat ki jaidbynriew kim pynbiang ïa ki kot ki sla kiba dei ban ïoh na ka KHADC bad don ruh ki katto katne kiba don tang ki NOC na ki Dorbar Shnong.
Haba kren sha ki lad pathai khubor u Bah John Lyngdoh President HYC Shillong City u la ong ba ka HYC kan bteng ïa kane ka jingkhynra licence sha kiwei pat ki bynta ki jong ka nongbah Shillong. U Bah John u la ong ruh ba na ka liang ka HYC kan leit beit ban ujor ïa kine ki dukan sha ka KHADC bad kan pynbor ruh ïa ki nongtrei jong kane ka ophis ba ki dei ban pyndep tista ïa la ka kamram ym ban shu shong beit ha ki ophis jong ki khlem pyndep hok la kamram kaba la bynshet.
Shuh shuh u Bah John u la kynthoh ruh ïa ki dorbar shnong kiba la ailad ïa kine ki dukan ban plie laitluid khlem ki kot ki sla kiba biang bad kumjuh ruh u la pynrem ïa ki katto katne ki Khasi kiba la wan ban ïada ïa ki bym dei Khasi kiba plie dukan be-ain khlem ki kot ki sla kiba biang.
