Nongstoiñ, Rymphang 06: Ka Tiehsaw Pengkyllut Youth Social and Cultural Sports Club (TPYSCSC), ryngkat ka jingïatreilang bad ka Mera Yuva Bharat (MYB) Nongstoiñ West Khasi Hills, ka la rakhe kyrpang ïa ka National Voters Day hapoh ka nongrim, ‘My Bharat, My Vote’. Kane ka jingrakhe ka thmu ban kyntu ïa ki samla bad ki nongshong shnong ban tip ïa ka hok kaba kordor kum ki nongthep vote.
Ïa kane ka prokram la plie da u President ka club, u Bah Bankit Wanniang ha kaba la don ryngkat u Rangbah Shnong ka shnong Tiehsaw, u Bah M.Dkhar, u ba la ai ruh ïa ka jingkren kyntu kynpham ha kane ka sngi.
U Bah Mebanshanborlang Marweiñ u la donlang kum u Resource Person ha katei ka sngi rakhe kaba long ha ka 24 tarik Kyllanglyngkot 2026, ban pynshai halor ka rukom bad ka jingdonkam ban long u nongthep vote u ba shai.
Na ka liang u Resource Person u la pynshai ba ka thong jong kane ka sngi ka long ban pynrung kyrteng ïa baroh kiba la biang 18 snem ka rta bad ban pynshlur ïa ki ban shim bynta ha ka roi ka par ka ri lyngba ka vote.
Kum ka dak ka jingpynshlur, ka Club ka la sam ruh ïa ki memento sha ki saw ngut ki ‘First Voter’ lane ki nongthep vote kiba nyngkong, kiba kynthup ïa 2 ngut ki samla shynrang bad 2 ngut ki samla kynthei.
Ha kane ka jingïalang la don ruh ka jingïasoi kyrteng jong baroh ki dkhot ka club, ki nongshong shnong, ki volunteer jong ka MYB kiba kynthup ïa ka D. Barikynti Diengdoh, ka Mebarishisha Lyngkhoi bad u Bah Richweaver Lyngkhoi.
