Pynliem ka Sputnik Spartan da 3 wiket ïa ka Young Guns ha ka SCA Cricket League Super Division 2026

SHILLONG, Rymphang 06: Ka Sputnik Spartan CC ka la khur jingjop da kaba pynliem noh da 3 wiket ïa ka Young Guns ha ka lympung Cricket League Super Division 2026 jong ka Shillong Cricket Association, kaba la long hynne ka sngi Thohdieng (06 tarik Rymphang).
Haba tied nyngkong hadien ba jop ïa ka jingkynting pisa (toss), ka Young Guns ka la shah weng lut baroh 10 wiket na ka bynta 135 ron haki 32 ober. Ki ar ngut ki nongtied kiba kham seisoh ki long u Mannan Surana (29 ron naki 66 bol) bad u Aditya Singh (17 ron naki 21 bol).
Hynrei ka jingïalehkai kaba kyrpang ka la wan na ki rangkawang bol jong ka Sputnik Spartan, ha kaba u Supriyo Chanda (6 ober: ailad tang 31 ron) bad u Jitumoni Kalita (9 ober: ailad 34 ron) ki la ïoh ban khur mar 4 wiket.
Haba beh ïa ka thong, ka Suptnik Spartan ka la hap 7 wiket, hynrei watla katta, ka kynhun ka la pyndep ïa ka kamram da kaba kamai 138 ron haki 32 ober ban pynskhem ïa ka jingjop da 3 wiket.
Napdeng ki nongkawang bol jong ka Young Guns, u Rudra Singh Rathore u la khur 4/41 naki 9 ober, katba u Grish Raj Ray u la khur 2/26 naki 7 ober, hynrei ka jingnoh synñiang jong ki ka la sepei namar ka kynhun ka la mad ïa ka nam rem.
Kiba la ïalam ha ka tied na ka bynta ka Suptnik Spartan ki long u Jitumoni Kalita (31 ron naki 19 bol) bad u Uttam Chanda (21 ron naki 56 bol).
Ha kaba kut, u Suprio Chanda u la ïoh ban khur ïa ka khusnam Player of the Match, hadien ba u la kamai 11 ron ha ka tied bad weng 4 wiket ha ka boling.