Kan long ka jingma kaba khraw bha lada ki samla ki la lap miet tang ha ka mobile phone: M Kharkrang

Shillong, Rymphang 02: U Rangbah Shnong ka Riatsamthiah uba dei ruh u Superintendent barim ka East Khasi Hills u Bah Mariahom Kharkrang (IPS) u la ong ba ka sorkar jylla ka la buh ïa ka jingai marks isynei kaba kyrpang kaba long 5 marks (Grace marks) na ka bynta ki samla kiba wad kam pulit ha ka jylla lada ki dei kiba la pyntbit ïalade ha ki kam ïalehkai bad u la ong ruh ba kan long pat ka jingma kaba khraw bha lada ki khun samla ne ki hep kiba rit ki la lap miet palat tang ha ka mobile phone naba kim pyndonkam shuh ïa ka met ban ïalehkai sha madan hynrei ki la shu shong beit hajuh ne ha jingthiah bad pyndonkam tang da ki shympriahkti.
Ïa kane u la ïathuh ha ka prokram ba pynhab pyrda ia ka jingdap kaba 75 snem jong ka Riatsamthiah Sports and Cultural Club kaba la long ha ka sngi Saitjaiñ jong u taïew ba la dep.
Haba pynshlur ïa ki samla jong ka shnong ba kin shim bynta bad pyntbit bha ïalade ha ki kam ïalehkai, u Bah Kharkrang u la ong, “Mynta ki samla Khasi ki la long kiba la biang bha ban ïakhun ïa ki eksam jong ki kam pulit naba la ïohi ba kiba duh ne bym pass haba ïakhun ïa kine ki eksam la ka dei ha Written test ne Physical test ki duna tang salit bha haba ïanujor bad kiba pass. Ngi lap ba ki samla ki bym pass ki duna tang 2 ne 5 marks eiei ïa kiba pass bad kane ka pyni ba ki samla Khasi kim duna shuh ban ïakhun ïa ki kam sorkar.”
“Phin sa ïohi ha ki sngi ban wan lada la dep ban pynlait ïa ki result jong ki kam pulit bad phin sa lap ba ka jingïapher jong ka jingïoh marks ka long kaba tang salit bha,” ong u Bah Kharkrang.
Haba ong ba mynta ka ban ïarap pynïoh kam sorkar ne kam pulit ïa ki khun samla Khasi ka dei bha lyngba ka Sports, na ka liang jong u, ula kyntu ïa ki kmie ki kpa ban pynshlur ïa ki khun ki kti ban shim bynta bha ha ki kam ïalehkai bad ym pat ban kilan met ïa ki da ki jingïalehkai hapoh ki mobile phone.
“Nga la ïoh sngew ba don napdeng ki kmie ki kpa kiba ïaroh bha ïa la ki jong ki khun ba ki la tbit bha ban ïalehkai phutbol, Table Tennis, Basketball bad kiwei kiwei, bad haba ynda kylli pat ki ïathuh ba ki dei kiba smat pat tang ban ïalehkai ïa ki games kiba don hapoh ki mobile phone bad kane ka long kaba ma bha ïa ka koit ka khiah jong ki, naba ki pyndonkam tang ïa ki shympriahkti ym pat ïa ka met baroh kawei,” bynrap u Rangbah Shnong ka Riatsamthiah.
Kumta na ka liang u Bah Kharkrang u la kyntu ruh ïa ka Riatsamthiah Sports and Cultural Club ba kan wad ïa ki khun samla ka shnong bad kumjuh ruh ïa ki hep kiba rit kiba don ïa ki sap ïalehkai bapher bapher khnang ba kin kiew ban lait na ki jingma kum na u drok bad kiwei ki kam sniew bad ha kajuh ka por kin wanrah burom ïa ka shnong bad ka jylla baroh kawei.
“Ngim kwah ban tip ba ki khun samla ka shnong kin leit ban ïalehkai sha kiwei ki jaka bad ban wanrah nam ïa kiwei ki jaka, naba ïoh lehse kim ïoh lad ha la ka jong ka shnong, hynrei ngi kwah ban ïohi ba ki khun samla ka shnong kin wanrah burom ïa ka shnong hi baroh kawei lyngba ki sap ki phong ba ki don khnang ba kin lah ban sei ïa ki na ka bynta ka jingmyntoi lang jong baroh,” bynrap shuh shuh u Rangbah Shnong.