Kyntu ka DC ka South West Garo Hills ban ym wanrah ïa ka jingsngewïapher jaidbynriew

Shillong, Rymphang 2 : Ka Deputy Commissioner ka South West Garo Hills ka Anendya Raajsshre mynta ka sngi ka la kyntu ïa ki paid nongshong shnong jong ka District ba kin ym wanrah ïa ka jingsngew ïapher jaidbynriew hynrei ban ïa im kum shi ïing shisem bad ban ïatrei lang ruh bad ki bor synshar district ym ban shim ïa ka aiñ ha la ki jong ki kti.
Haba kren ha ka jingïalang ban pynneh pynsah ïa ka shongsuk shongsaiñ mynta ka sngi ha Ampati ka Raajsshre ka la ong ba ïa ka South West Garo Hills District la tip kum kata ka district ba shongsuk tam wat la ka don bun jaid ki jaidbynriew ba shong shnong ha ka kiba ngeit ruh ha ki niam bapher bapher.
Ki bor synshar district ki la kular ïa ki paid nongshong shnong khamtam kito kiba poi sha ka jingïalang ban pynneh pynsah ïa ka shongsuk shongsaiñ hapdeng ki jaidbynriew kiba im ha khappud jongka West Garo Hills bad kumjuh ruh bad ka South Salmara District jongka Assam bad kyntu ïa ki nongkhaïi bad ki riew paidbah ban ïa im suk im saiñ lang baroh.
U SP jongka District u Vikash Varma ruh u la kyntu ïa ki paid bah ban ïa im suk im saiñ ym ban ngeit ha ki khana hamsaia lyngba ki soical media bad haba don kino kino ki jingpynmih khubor ha ki social media donkam ban pynshisha ym ban shu ngeit biej bad kaba kham kongsan ka long ban pyntip ïa kino kino ki jingtip sha ki Police Station kiba jan tam.
ïa kane ka jingialang la khot mynta ka sngi namar ka la ktah jur ïa ka jingkhaïi kwai bad tympew namar ba ka don ka jingkyan jingkynad sngewpher jaidbynriew kaba shyrkhei bha ha ri lum Garo. La ïadon lang ha ka jingialang naduh ki Nokma Council, ki Nongialam Niam bapher bapher, ki Seng Bhalang, ki Riew Pawkhmat, ki Committee jong ki ïew bapher bapher bad ki Nongrep kwai tympew bad kumjuh ruh ki nongkhaïi.
Ka jingïalang ka la pynrem jur ruh ïa ka jingjia ba dang shen ha Goalgoan , Rajabala kaba la wanrah ka jingiap ïa uwei u dkhot ka ACHIK bad na kane ka daw sa jur ka jingïakynad ha ri lum Garo. Ki bor synshar district ki kyntu ban pynneh pynsah ïa ka shongsuk shongsaiñ kumba ïalong baroh shi katta ym ban shah ïalam bakla ha kino kino ki kynhun pynshit sngewpher jaidbynriew.