Shillong, Rymphang 2 : U Myntri ka tnad ka koit ka khiah u Ma Wailadmiki Shylla mynta ka Lah Sngi U Blei u la ong ba ka sorkar ka la peitngor bad pynkhreh ban ïakhun ïa u khniang jingpang Nipah wat la haduh mynta ym pat don ba ïabit ïa kane ka jingpang hapoh ka jylla ruh.
U la kren ïa kane halor ka jingkylli kumno ka sorkar ka leh lada jia ba une u khniang jingpang u pur sha ka jylla namar ha West Bengal ki la don kiba ïabit ïa une u khniang jingpang. U Myntri u la ong “ Kat haduh mynta ym pat don ba bit ïa une u khniang jingpang bad kumta ka sorkar kam kwah ban pyntieng pynsmiej ïa ki paidbah tangba ka tnad ka koit ka khiah ka la long kaba la pynkhreh lada jia kumno re kumno ki don kiba ïabit na une u khniang jingpang.
U Khniang jingpang Nipah u dei uba ïabit na ki mrad sha ki briew bad la lap nyngkong eh ha u snem 1998 ba kane ka khlam ka sar hapdeng ki nongri sniang ha Malaysia. Ha u 1999 ka la pur sha Singapore bad kane ka la jia namar ki thied ïa ki sniang kiba la kem pang na Malaysia.
Ha kaba ïadei ba ka National Games ka ban long ha kane ka jylla u Myntri u la ïathuh ba ka sorkar ka la pan jingïarap pisa na ka sorkar pdeng namar ka don hapdeng ka jingduna pisa. “ Khlem artatien ngi khmih lynti ba ka sorkar pdeng kan theh bun ka jingïarap pisa tangba na ka liang ka sorkar jylla ruh ka hap hi ban pynkhreh”, ong u Myntri.
ïa mynta hi ym pat lah ban ong haduh katno kan lut namar ka tnad kam sport ka dang pynkhreh ïa ki jingkheiñ ki jingdiah ryngkat bad kiwei kiwei ki tnad ki ban ïadon bynta lang.
