Ka Meghalaya ka dei ban bud nuksa ïa ka Assam, shwa ban kyntiew kyrdan ïa ki ophisar Pulit: Vaiphei

Shillong, K’Lyngkot 30: U chairperson ba la kut noh noh ka samoi trei kam jong ka Meghalaya Human Rights Commission (MHRC) u Justice (Retd) T Vaiphei u la ong ba ka jylla Meghalaya ka dei ban bud ïa ka nuksa jong ka Assam da kaba pan ïa ka jingmut na ka commission shwa ban kyntiew kyrdan ïa ki ophisar pulit.
Haba ïakren bad u nongthoh khubor hadien ka jingialang khublei jong u kaba la long ha ophis ka MHRC ha ka sngi Palei, u Vaiphei u la ong ba ka jingpan jingmut na ka human rights commission shwa ban kyntiew kyrdan ïa ki ophisar pulit kan long ka sienjam kaba bha ban ym pynkhein ïa ka hok longbriew manbriew da ki bor pahara.
Ka Assam ka shim ïa ka jingmut jong ka Human Rights Commission ha kaba ïadei bad kane ka bynta.Ka Meghalaya ruh ka lah ban bud ïa kane”, u la bynrap.
Shuh shuh u Vaiphei u la kyrshan ruh ban pynbiang biang pisa sha ka commission ban lait na ka jingpynslem ban ioh pisa na ka bynta ki kam kiba donkam.
U Vaiphei uba la shakri kum u khlieh jong katei ka commission la jan 6 snem, u la pyntip ba ka commission ka la pynbeit ïa ki 90 tylli ki cane ne mukotduma bad kumba 170 tylli ki case ki dang sahteng.
Kum ka judicial inquiry commission kaba don tang uwei u briew, u Vaiphei u la tohkit ruh ïa ka jingshah pyniap u general secretary barim ka HNLC u Bah Cherishstarfield Thangkhiew kaba la mih ka jingkulmar bad ka jingjia shah siat ha Mukroh.
Kham ha shwa ka jingialang khublei khatduh, ki dkhot jong ka komishon, u bah B Giri, u bah H Nongpluh bad u dkhot barim u bah PJP Hanaman ki la ai khublei ia ka jingnoh synniang jong u chaiperson bad ki la pynkynmaw ruh ïa ka jingiasyllok jong ki bad u.