Sngewnguh ka seng longkmie, Umphrup Pdeng shnong ïa u Bah Lambor ba pynïoh ïa ka ophis treikam

Shillong, K’Lyngkot 30: Ka seng longkmie jong ka shnong Umphrup Pdeng shnong kala pynpaw ïa ka jingsngewnguh ïa u MLA bad MDC barim jong ka Nongkrem Constituency u Bah Lambor Malniang, uba la pynioh ïa ka scheme na ka bynta ban shna ïa ka office trei kam jong ka seng na ka bynta ban pyntyllun ki kam jong ka seng.
Kane ka jingpynpaw ka seng long kmie Pdeng Shnong Umphrup kala wan hadien ba u Bah Lambor Malniang u la leit ban plie paidbah ïa ka office trei kam jong ka seng long kmie ha ka jingsakhi lang ki long kmie ka shnong Umphrup, Pdeng Shnong bad ki nongkitkam ka shnong Umphrup Pyllun.
Ïa kane ka scheme u Bah Lambor u la pynioh lyngba ka Chief Minister Social Development Fund (CMSDF), ha ka mang tyngka T. 203000 lak jong u snem 2024-2025.
Haba kren kum u kongsan u Bah Lambor u la ong, Ha kane ka por nga dap da ka jingkmen wat lada ngam dei shuh u ei u ei ne u nongmih khmat ban don ïa ka atiar hynrei ka mynsiem ka rhem bad dei namar ka don ka jingïeit na ka bynta ka shnong bad ka constituency ïa kaba la shim kum ka shnong trai ka jong nga.
Nga ai khublei kyrpang ïa u Myntri Rangbah ka jylla u Conrad K Sangma u la kloi ban ai ïa kane tang hadien ba nga leit ban kyrpad ïa hadien ka jingtynrong jong ki longkmie ïa nga halor kane.
Shuh shuh u la ong, Ka lynti ïaid ka jong nga ka long tang kawei ka lynti khlem da peit khmat ïano ïano ruh khlem da kdew kti ïano ïano ruh bad da kawei ka sur nga leit bad nga ai nguh ïa u blei ba u pynlong kumne kumba nga long ba kiwei ki paralok kin sngap bad shah shkor ïa kaei kaba nga ong bad kane ka lynti kadei namar ka jingïeit ïa ka Nongkrem Constituency.
U Bah Lambor u la pynpaw ba u dap da ka jingkmen ba u la ioh ban plie paidbah ïa kane ka office, hynrei un da kmen palat lada u iohi ba kane ka office kala trei kam pura na ka bynta ka bha ka miat jong ka shnong hi baroh kawei.
Na ka liang u Bah Wanshon Nongspung uba dei u Rangbah Shnong ka Dorbar Shnong Umphrup Pyllun u la pynpaw ia ka jingkmen ba la ioh ban plie ia ka jaka trei kam jong ki seng long kmie bad u la kyntu ba kin peit lem ia ka bha ka miat jong ka shnong.
Shuh shuh u Bah Nongspung u la ban jur ïa ki longkmie ba kin peit lang ïa ka jingeh kaba lah ban mih na ki jingdih ba sniew kum na u drok bad ka kyiad kaba la kyrni bha ha kiba bun ki jaka, khnang ba ka shnong ka thaw kan lait na kine kiei kiei baroh.