Shillong, K’Lyngkot 29: Namar ka jingkhlad noh u Ajit Pawar, uba dei u Symbud Myntri Rangbah ka jong ka jylla Maharashtra, ka sorkar jylla ka la rai ban pynkynriah noh ïa ka Meghalaya Spice Festival kaba la thmu ban pynlong naduh ka 30 tarik u Kyllalyngkot haduh ka 1 tarik u Rymphang, 2026.
Ïa kane ka Meghalaya Spice Festival la thmu ban pynlong ha Jio World Drive, Mumbai.Ïa kane ka rai la shim kum ka dak jong ka jingburom ha ka por sngewsih jong ka jylla kaba la pynbna hadien kane ka jingjia ba sngewsih.
Ka sorkar Meghalaya ka pynpaw ïa ka jingsngewlem kaba khraw sha ki longïing kiba la duh noh bad ka ieng ha ka jingïatylli bad ki paidbah bad ka sorkar Maharashtra ha kum kane ka khyllipmat jong ka jingduh.
Ïa ki tarik ba la pynkylla bad ïa ki jingtip ba kham bniah ha kaba ïa dei bad ka Meghalaya Spice Festival yn sa pynbna ha ka por kaba biang.Kane ka long katkum ka kyrwoh khubor na u Deputy Secretary jong ka tnad Agriculture & Farmers’ Welfare jong ka sorkar Meghalaya.
