Shillong, Kyllalyngkot 29: Ka kynhun phutbol jong ka jylla Meghalaya ka la mad ïa ka nam rem ba nyngkong ka jong ka, ha ka lympung ïalehkai jong ka National Football Championship na ka bynta ka Santosh Trophy 2025-26, hadien ba ka la shah pynliem noh da 3-0 kol ha ka kynhun ïalehkai ka Kerela, ha ka jingïakhun kaba la long hynne ka sngi Palei ha Silapathar, Assam.
ïa ki lai tylli ki kol ka Kerela la thep lyngba u Arjun V (36′), Muhammed Riyas Pt (71′) bad Muhammad Ajsal (85′) bad da kane ka nam rem, ka Meghalaya kan ïai neh ha ka kyrdan kaba lai ha ka Group B hadien ba ka la ïoh ba kan khur 5 point, hynrei kaei kaba dang sah pat ïa ka Meghalaya ka long ïa ka jingïakhun ba khatduh ka jong ka pyrshah ïa ka Railways kaban long ar sngi hadien kane ka jingïakhun kaba mynta ka sngi.
Na bynta ka jingïalehkai ba long hynne ka sngi, u coach ka Meghalaya u bah Khlain Pyrkhat Syiemlieh u la wanrah lai tylli ki jingkylla ha kaba u Wanboklang Lyngkhoi, Marbiangki Suchiang bad u Fairming Suting ki la ïoh ban ïalehkai naduh kaba sdang ha ka jaka ka jong u Mebanaibok Kharbudnah, Dibormi Kassar bad Dawanchwa C Challam.
Ka lynti ïaid ïa ka Meghalaya ha kane ka lympung tad haduh ba kut ka jingïakhun ba hynne ka sngi ka ka long ba ka la sdang shwa da ka jingjop pyrshah ïa ka Odisha, bad hadien kane ka la lah ba kan ïakhaid pyrshah ïa ka Punjab bad kumjuh bad ka Services.
Ka kol ba nyngkong ba ka Kerela ka la ïoh ba kan thep ka long hadien ba ka bol kaba u Arjun u la shut lyngba ka freekick ka la lah ba kan ïaid lyngba lut ïa baroh ki player ba don hajan ka kol ka Meghalaya bad kluk ka la rung beit shapoh, bad ïa ki kol ki kol kiba sah pat ki wan ha ka kylla miet, kaba hangne la shem bad ïohi ba ka kut ïalehkai (defend) jong ka Meghalaya ha kane ka jingïakhun ka duna bad tlot bha.
Kumba ba ka long ka Meghalaya ka sah satang kawei ka jingïakhun ha kane ka group bad katta ka long pyrshah ïa ka kynhun ïalehkai jong ka Railways kaban long la sngi Saitjain, ka 31 tarik Kyllalyngkot, ha ka juh ka por kan hap ruh ba kan peit siar ïa ka kynhun ïalehkai ka Punjab bad ka Services, ha kaba ka Punjab kan ïakhun pyrshah ïa ka Odisha.
Katba ka Kerela kaba la pynthikna ïalade ban bat ïa ka kyrdan ba nyngkong na kane ka group kan ïakhun pyrshah ïa ka Services, kaba lehse ka lah ruh ba kan ailad ïa ki rang ïalehkai ba kynsai jong ka ban shongthait bad sei bujli pat da kiwei ha ka jingïakhun pyrshah ïa ka Services.
