Da ka burom rung ka lahduh jong ka All India CM Gold Cup ha Nongkseh, ïoh jingïaroh ki rangïalehkai
SHILLONG, Kyllalyngkot 29: Ka kynhun ialehkai jong ka Nongkseh Sports Social and Cultural Club ha ka janmiet sngi Balang ka la ioh ia ka jingpynkup burom kaba shongkun na ka Dorbar Shnong Nongkseh halor ka jingkhur jong ka ia ka nam lahduh ha ka lympung ialehkai jong ka All India Chief Minister International Gold Cup 2026 kaba dang shu kut dang shen ha Jorethang, Sikkim.
La pynshongkun ia kane ka jingpynkupburom da ka jingdonlang u Myntri ka tnad Ialehkai ka jylla Bah Wailad Shylla kum u Kongsan, nangta u MLA ka Mylliem Bah Ronnie V Lyngdoh, u President ka Meghalaya Football Association Bah Hamletson Dohling, u President ka Shillong Sports Association Bah Banteidor Lyngdoh, u Rangbah Shnong ka Nongkseh Bah MyrankThangkiew, President ka Club Bah Daniel Thangkhiew, BDO ka Mylliem bah T Marwein bad kiwei kiwei.
Ka Nongkseh ka la ioh ban thaw record ha ka histori jong ka jingialehkai phutbol ka Jylla da kaba long ka kynhun lehse kaba nyngkong eh, ba kan jop lynter haduh lai tylli ki trophy ne ki nam lahduh khlem ka jingshah rem wat tang shisien ruh ha ka jingialehkai.
Ka jingjop ba nyngkong ia ka nam lahduh kala wan ha ka samoi ialehkai 2025 ha ka lympung ialehkai 1st Division jong ka Shillong Sports Association bad nangne, kala bteng ia kane ka lynti iaid ban ioh rah ia ka nam lahduh sa ha ka Champions Cup jong ka Shillong Sports Association bad mynta sa ha ka All India Chief Ministers International Gold Cup 2026 ba long ha Sikkim.
U President ka Nongkseh SSCC Bah Daniel Thangkhiew ula ai jingiaroh ia ka kynhun ialehkai bad khamtam eh ia u Coach ka kynhun Bah Richardson Nongneng uba la btin lynti ia ka kynhun ban ioh rah haduh lai tylli ki trophy.
Shuh shuh pynbna ba ka Nongkseh SSCC kan sa iasoi contract sa bad lai ngut ki rang ialehkai Khasi bad kan sa pyllait paidbah ruh shen ia ki jersey thymmai jongka club.
U Bah Hamletson ula iaroh ia ka Nongkseh hapoh ka jingialam u Bah Daniel Thangkhiew uba ieid ia ka Football, ban kyntiew ia kane ka Club bad ka jingjop dang shen ka Nongkseh kala wanrah ia a nam bad burom ia ka jylla bad ia ka jaidbynriew baroh kawei.
U Bah Ronnie V Lyngdoh ula pynpaw ia ka jingkmen ba ka NSSCC kala jop ia ka lympung ialehkai ha Sikkim bad khamtam haba kiba bun ialehkai kidei ki samla Khasi suda bad ula iaroh ia ka jingshimkhia u Bah Daniel Thangkhiew ban saindur ia kane ka klob.
Na ka liang u Kongsan pat u la pynbna ba ka sorkar jylla kala mynjur ia ka polisi treikam na ka bynta ki nongialehkai ka jylla, kumta kino kino ki nongialehkai ka jylla kiba wanrah ia ki takma ha ka National Games, Asian Games, Olympics ne Paralympic kin ioh beit beit ia ka kam sorkar bad kane kan ai mynsiem ia ki nongialehkai bad ia ki bahaiing bahasem ba kin ai jingkyrshan pura ia ki.