972 mm ther u lapbah Sohra ha ka shi sngi, uba lai ha ka jingjur tam hadien 122 snem

Shillong, Jylliew, 17: Ka shnong Sohra kaba pawnam ha ka jingjur slap tam ha ka pyrthei ka la ïoh bat biang ïa kane ka nam tang hapoh ar sngi ba u lapbah uba la ther haduh 811.6 mm bad tang hapoh 24 kynta ka shnong Sohra ka la ïoh pdiang ïa u lapbah uba jur haduh 972 mm tang ha une u bnai Jylliew bad uba lai ka jingjur slap tam hadien 122 snem, ong ka India Meteorological Department (IMD).
Ka Sohra ka la ïoh pdiang ïa ka jingjur slap kaba palat 800 mm ha ki khyndai sien ha une u bnai Jylliew naduh ba ka IMD ka la sdang ban buh jingkheiñ ha u snem 1901, ong ka kaiphod jong ka IMD.
Tad haduh ka sngi Thohdieng, ka shnong Sohra ka la ïoh pdiang haduh 4081.3 mm u slap tang mynta u bnai, ong u Scientist E ka Regional Centre, Guwahati jong ka IMD u Sunit Das.
Ha ki 24 kynta ba la leit noh tad haduh ka por 8:30 baje mynstep jong ka sngi Balang, kane ka shnong kaba hap hapoh ka East Khasi Hills District ka la ïoh pdiang ïa u lapbah uba jur haduh 811.2 mm.
Ha ka 16 tarik Jylliew,1995 ka shnong Sohra ka la ïoh pdiang 1563.3 mm u lapbah. Shi sngi shwa kata, ha ka 15 tarik Jylliew, 1995, ka la ïoh pdiang 930 mm u slap.
Kane ka shnong kaba don ha jrong lum ka la ïoh pdiang 973.8 mm u lapbah ha ka 5 tarik, Jylliew, 1956.
“Kam pat ju slap haduh kumne. 50-60 cm ka dang dei kaba shu lap malu mala (ha Sohra) kata shisien lane ar sien mala u snem. Hynrei 80 cm shanng ka dei kaba ju slap borabor,” ong u Das.
“Ka jingbeh paswut jong er khriat ha kine ki khyndiat sngi bad ka jingwan beh ka er sepngi ka la wanrah ïa ka lyer sngem na duriaw bah Bay of Bengal. Kane ka lyer ka la takhuh bad ki mawsiangbah jong ka rilum Khasi bad pynhap ïa u slap,” u la ong.
Ka Sohra ka la ïoh pdiang 673.6 mm u lapbah tang ha ka sngi Palei, 811.6 mm ha ka sngi Balang, 62.6 mm ha ka sngi Baar, 293 mm ha ka Lah Sngi u Blei bad 354 mm ha ka sngi u Blei.
Ka jingther jong u lapbah uba jur la khmihlynti ba un dang ïai bteng sa ha kine ki shi sngi ar sngi, ong u Das.
Ka shnong Mawsynram kaba jngai 10 kilomitar na ka shnong Sohra, kaba dei ruh ka shnong kaba jur slap tam ha India, ka la ïoh pdiang 710.6 mm u lapbah hapoh ki 24 kynta ba la leit noh tad haduh ka por 8:30 baje mynstep jong ka sngi Balang kaba dei ruh ka jinghap slap kaba jur tam haduh u bnai Jylliew, 1966.
Ha ka 10 tarik, Jylliew, 1966, ka shnong Mawsynram ka la ïoh pdiang 717.6 u lapbah. Ha ka 7 tarik, Jylliew, 1966, ka la ïoh pdiang 944.7 mm, kaba long ka jingjur slap kaba heh tam ha u bnai Jylliew naduh ba ka IMD ka la sdang ban buh jingkheiñ.
Kane ka shnong ka la mad ruh ka jingjur slap kaba 623.4 mm kaba la neh baroh 24 kynta ha ka 8 tarik Jylliew, 2015.
Ka jinghap slap ïa mynta ha Mawsynram ka long 11802.4 mm (kata naduh u snem 1974-2022). Katba ka Shnong Sohra ka la ïoh slap 11359.4 mm ha ka shi snem (kata naduh u snem 1971-2020),” la ïathuh u Das.
Ka IMD ka ladep maham lypa ba kan don ka jingther jong u lapbah uba jur ha Meghalaya bad Assam ha ki ar sngi ki ban sa wan..
La ïathuh ruh ba u lapbah uba jur ryngkat bad leilieh, u pyrkhat kan dang ïai bteng ha ka 17 tarik haduh ka 20 tarik mynta u bnai bad hadien kane, ka jingjur jong u slap kan sa hiar suki suki.
Ka thaiñ Shatei Lammihngi baroh kawei ka la ïoh pdiang 220.3 mm u slap bad 39 percent na kaba ju long, kata, naduh ka 1 tarik Jylliew mynta u snem hadien ba la sdang wan jngoh ka lyiur.
Ka Meghalaya ka la ïoh slap 865.7 mm, 153 percent na kaba u slap u ju hap naduh ka 1 tarik mynta u bnai Jylliew.
Ka jinghap slap ha Arunachal Pradesh ka long 253.1 mm, 22 percent na kaba u slap u ju hap, katba ha ka jinghap slap ka long 372.9 mm kaba tam da 79 percent.
Katba ha kiwei pat ki jylla ha kane ka thaiñ, kata, ha Manipur, Mizoram bad Tripura ka jinghap slap ka long tang 50 percent, 46 percent bad 38 percent.