Shillong, Lber 29: Ka Jaylynn Marak ka la lah ban ïalehkai bha da kaba khyrwit haduh 96 ron marwei shwa ba kan khur hynriew wicket na bynta ka South Garo Hills kaba la pynliem ïa ka Tura District Cricket Association ha ka Zone 2 jong ka lympung ïalehkai U-23 Women’s Inter District Cricket Tournament kaba long ha Nongalbibra, South Garo Hills, ha ka sngi Ba-ar.
Hadien ba kala jop ïa ka jingkynting pisa, ka SGH ka kam trai ban tied nyngkong bad kamai da 177 duh noh 5 wicket ha ki 35 over, ha kaba ka Jaylynn ka khyrwit 16 tylli ki four ha ka inning kaba kamai 96 ron na ki 107 bol. Ka Tura kala ailad haduh phra ngut ki thei kawang bol hynrei dei tang ka Preangchi kaba ïoh kham bun da 2 wicket ai kamai 27 ron.
Haba wan beh ïa katei ka thong, ka Tura ka kamai tang 86 ron bad shah pynkhyllem lut baroh ki wicket ha ki 21 over bad ka SGH kala jop da 91 ron. Ka Kamchira ka kamai bun ron na bynta ka Tura da 21 ron, katba ka Jaylynn ka la ïoh ban khur hynriew wicket ai kamai 16 ron bad ka Kim D Shira ka ïoh 2 wicket ai kamai 31 ron.
Ka South Garo Hills kan mih madan biang mynta ka sngi Balang pyrshah ïa ka North Garo Hills. Ha kawei pat ka jingïakhun jong ka Zone 1 kaba dei ka semi-final kaba nyngkong kan long mynta hi ka sngi Balang ha Nongstoiñ, ha kaba ka East Khasi Hills kan ïakhun pyrshah ïa ka Shillong CA.
