900 klur tyngka yn pyllait ka sorkar ban siew ïa ki bill ba sahteng jong ka skhim JJM

Shillong, Iaiong 9 : Ka Sorkar Jylla ka la pynkhreh ban siew khuid noh ïa ki bill ba sahteng, kiba kot palat 900 klur tyngka sha ki contractor kiba pyntrei ïa ka skhim Jal Jeevan Mission (JJM) ha ka Jylla.
Haba ïathuh ïa kane ha ka sngi Palei, u Myntri ka Tnad Public Health Engineering (PHE) u Marcuise N Marak ula ong “Ki bill ba sahteng jong ki contractor ba pyntrei ïa ka JJM ki kot palat ïa ka 900 klur tyngka, hynrei ka kam ban siew noh ïa ka pisa kan sa sdang noh shen hadien ba la dep pyndep ia ki jingdonkam ba hap ban leh baroh”.
“Ngi la ïasoi ïa ka MoU ban pyntreikam ïa ka JJM 2.0. Baroh ki project bala pyndep hapdeng 75 haduh 100% yn sa siew pisa noh shisien ba ka Ophis ka la pyndep ïa ki jingdonkam ba hap ban leh” ong u Marak haba bynrap ba ka Tnad ka la leh shaid shaid ïa ki kam kiba hap pyndep.
U Myntri ula batai ba ka jingslem ka jingsiew ka dei namar ka jinghap pyndep ïa baroh ki kyndon ba la buh da ka Ministry of Jal Shakti ka Sorkar India, kynthup ka jingpynbeit ryntih ïa ki jingpynlut bad ka jingshna ïa ka Sujal Gaon ID ïa man kawei pa kawei ka project.
“Kito ki project kiba la pyndep 75 haduh 100 %, ka tnad ka la dep ban leh ïa ka jingpynbeit ïa ki jingpynlut. Ka Sujal Gaon ID ka dang ïaid mynta bad ngin sa pyndep noh shen” ong u Marak.
Halor ki jingkynnoh ba la siang ïa ki pipe um khlem da pynpoi um, u Marak ula ong ba kane hi ka dei na ka daw jong ki tyllong um bad ka jingbym pat pyndep ïa ka project, haba kular ba ka Sorkar ka la shim khia ïa kane.