New Delhi, Naiwieng 16 : Ka nongbah Delhi ka la sakhi ïa ka jinghiar kynsan ka jingkhriat haduh 90 Celsius ha kane ka sngi U Blei kaba poi haduh u pud ba ka jingkhriat ka la hiar kynsan haduh 4.5 degree na kaei kaba ju don baroh shi katta kaba pynlong ïa ka nongbah ban mad ïa ka jingkhriat kaba jur ha u Naiwieng ha kine ki lai snem ba la dep, ong ka tnad ba peit ka jinglong jingman ka suiñbneng.
Kane ka sngi ka pynlong ruh ïa ka nongbah jong ka Ri ban sakhi ïa ka jingkhriat kaba jur naduh ka 29tarik Naiwieng, 2022 ha kaba ka Delhi ka mad ïa ka jingkhriat kaba haduh 7.3 degree Celsius. Dang ha u snem 2023 ka jingkhriat kaba jur ka dei ha ka 23tarik Naiwieng haduh 9.2 degree bad ha u 2024 pat ka jingkhriat ha ka 29tarik Naiwieng ka la hiar sha ka 9.5 degree.
Na ka liang ka India Meteorological Department (IMD) ka la pyntip lypa ba kan don ka jingjur lyoh khyndew kaba jur bha ha ka sngi Nyngkong ha kaba ka jingshit jingkhriat kan poi hapdeng 25 – 9 degree celsius.
Nangta la kdew ruh ba ka jinglong jingman ka lyer ruh ka long kaba jaboh bha ha kane ka sngi u Blei namar ha ki 24 kynta ka Air Quality Index (AQI) ka la poi 377.
Katkum ka jingkdew jong ka CPCB Sameer App, haduh 11 na ki 39 tylli ki monitoring station ki la kdew ba ka AQ1 level ka la jur haduh katta katta kaba la poi palat 400.
Katkum ki jingkdew jong ka CPCB, ka AQ1 hapdeng 0-50 la niew ba ka dei ka lyer kaba khuid bha, nangta 51-100 ka dei kaba biang, 101 – 200 kadei kaba pdeng, nangta 201 – 300 kadei kaba la sdang sniew, 301 – 400 pat ka dei kaba la sniew bha ka lyer bad 401 – 500 lei lei kadei kaba la sniew shaba palat.
