9 tarik u Jymmang pynbna ka KSU ban pynlong Elekshon na ka bynta ka samoi trei kam 2026-2029
Shillong, Lber 29: Ka Election Committee ba la jied da ka CEC jong ka Khasi Students’ Union (KSU), ban pynïaid ïa ka ilekshon kaba XVI sha ka ophis trei kam jong ka KSU naka bynta ka samoi trei kam 2026-2029, ka pynbna ïar lyngba kane ka kyrwoh ba ka ilekshon kan long ha ka 9 tarik u Jymmang, 2026 naduh ka por 8 baje mynstep haduh 3 baje janmied ha Dinam Hall, Jaiaw, Shillong.
Ha kaba iadei bad kane ka phang, kane ka Committee ka khot ka wer ia baroh ki khun samla kiba la ih jong ka bri u hynniewtrep, khamtam na ka liang ki dkhot jong ki unit bapher bapher ka KSU ba kin mih shakhmat ban ïakit ïabah lem ïa ka lyngkor ba khia jong ka KSU naka bynta ka ri bad ka jaitbynriew, da kaba ia shim bynta shitrhem kum ki kyrtong ha katei ka ilekshon.
Ïa ki jingtip ba bniah halor kane ka kam lah ban ioh na ka ophis trei kam ka KSU ha Jaiaw Chapel, Shillong.
Na ka liang u Chairman ka Election Committee ka KSU u Bah Danny M Khyriem bad u Secretary u Bah Samuel B Jyrwa kila pyntip ba ïa ki nomination paper yn sdang ban ai naduh ka 04 tarik u Iaiong haduh ka11 tarik u Iaiong, 2026 naduh ka por 11 baje mynstep haduh 5 baje janmied na ka Ophis trei kam ka KSU.
Na ka bynta ban pynpoi ia ki nomination paper kan long naduh ka 06 tarik u Iaiong haduh ka13 tarik u Iaiong, 2026 haduh ka por 5 baje janmied.Ka jingweng noh ia ka nomination paper la buh tang ha ka 14 tarik u Iaiong 2026.
Ka jingbishar ia ki nomination paper kan long ha ka15tarik u Iaiong, 2026 ha ka por 1 baje nohphaisngi.Ia ki nomination paper dei ban pynpoi ha lane shwa jong katei ka tarik ba la kdew haneng ha u Chairman lane Secretary ka Election Committee.
Ka Election Committee ka bthah ia baroh ki unit, circle bad district unit ban pynpoi ia ki kyrteng jong ki nongjied kaba long 10 ngut na kawei kawei ka unit, circle bad district hapoh ka 11 tarik u Iaiong, 2026 ha Ophis trei kam jong ka Seng ha Jaiaw.
Ka Committee ka sngewbha ruh ban pyntip ba ka la jied ïa ki katto katne ki nongialam ba rim, ki riew rangbah, ki nonghikai bad kumjuh ruh na ka liang ki lad pathai khubor ban long kum ki nongpeit pyrman ïa ka jingïaid beit ïaid ryntih jong kane ka ilekshon.