Shillong, Nailar, 17: Ka Dorbar Synrai jong ka Meghalaya Legislative Assembly kan sa long naduh ka 9 tarik haduh ka 16 tarik u Nailur, 2022.
Ïa ka almanak na ka bynta kane ka dorbar synrai ka ban sa long la mynjur ha ka jingïalang jong ka Business Advisory Committee (BAC) ïa kaba la pynïaid da u Lamphang jong ka Iingdorbar Thawaiñ ka Jylla u Bah Metbah Lyngdoh ha ka sngi Balang.
Ha kane ka jingïalang, la ïashim bynta lang da u Symbud Myntri Rangbah u Bah Prestone Tynsong bad u Nongïalam ka Liang Pyrshah u Dr. Mukul Sangma.
Ka sien shong dorbar kan long haduh hynriew sngi kynthih ïa ki kam jong ka Sorkar la pynrung ban ïakren ha ka 9 tarik, 13 tarik bad 16 tarik Nailur, katba na ka bynta kiwei pat ki mat ba la wanrah da ki dkhot jong ka Iingdorbar yn sa ïatai ha ka 12 tarik, 14 tarik bad 15 tarik Nailur..
Ha ka jingïakren bad ki lad pathai khubor hadien ba la wai ka jingïalang, u Mukul Sangma u la ong ba ka Liang Pyrshah kan sa peit kumno ban pyndonkam pura ïa ka por ïa kaba la ai sha ki dkhot jong ka iingdorbar.
“Ngi kyrmen ba kane ka dorbar synrai kan long kaba pynmyntoi,”u la ong.
Haba kylli, kum kiei ki mat kiba ka Liang Pyrshah kan rah ha kane ka dorbar synrai, u Sangma u la ong, ki don bun tylli ki mat ki ban ïakren bad ka Liang Pyrshah kan sa ïatreilang kawei kumno ban buh hakhmat ïa ki mat kiba kham donkam jong u paidbah.
“Namarba ki don bun tylli ki mat ïatai, ngin hap ban pyndonkam da ka jingstad ïa ka por bad ban peit ba kan ym long ka jingïatai kaba pynlehnohei khnang ba ka jingïashim bynta kan long pura na baroh ki dkhot jong ka iingdorbar kata na ka Liang Pyrshah bad na ka Liang Synshar,” la ong u Sangma.
Kane ka dorbar synrai kan dei khatduh eh jong kane ka samoi san snem shwa ba ka Jylla Meghalaya kan sa jied ïa ki nongmihkhmat kiba thymmai ha ka Elekshon ka ban sa long ha u snem 2023.
