9 sngi la ïakhih shong kyllaiñ myngngor ki Nonghikai SSA ym pat khot iakren ka sorkar

Shillong, Risaw 9: Ka sorkar jylla kam pat khot ïakren ïa ki nongïalam jongka All Meghalaya Sarva Shiksha Abhiyan School Teachers’ Association (AMSSASTA) watla ka dang don hapdeng jong ka jingïakhih da kaba shong kyllaiñ myngngor mynta la 9 sngi , ban pynbor ïa ka sorkar ban pyntreikam noh ïa ka jingkyntiew ïa ka tulop jongki 13000 ngut ki nonghikai SSA.
Ha kaba pynpaw ïa ka jingsngewkhia halor ka jingleh kuman jong ka sorkar jylla, u General Secretary ka Association u Bah Wanpyndaphi Lapang ula ong, “Kam shym la don kano kano ka jingkhot ïakren halor ki mat jingdawa ki jong ngi wat hapdeng ka jingshisha ba ha ka sngi Thohdieng jong ka taiew bala dep u Nongaibuit jong ka tnad pule puthi u Bah HM Shangpliang ula wan jngoh ïa ka jaka ba pynlong ïa ka jingïakhih. Kam shym la don kano kano ka jingkhot ïakren hynrei ngi dang ïai ap”.
U Bah Lapang ula ong ba ka Association kan sa shong shen ïa ka jingïalang ban rai ïa ki sienjam kiba nangne shakhmat ha kaba ïadei bad ka mat jingdawa.
“Ngin sa ïa shong ha kine ki sngi ban wan ban shim ïa ka rai ïa kaei ka sienjam kaba ngin shim ban pynbor ïa ka sorkar jylla”.
Ka sorkar jylla kan donkam ban pynlut sa kumba T.300 Klur na ka bynta ban pynkiew ïa ka tulop jong ki nonghikai SSA, kane ka long katkum ka tyllong khubor kaba la ïoh na ka sorkar.
Haba kylli, u Bah Lapang ula ong, “Kane ka dei ka jingdawa kaba la sahteng naduh u snem 2019. Kiwei ki sorkar ki la pdiang ban kyntiew ïa ka tulop ka jong ngi da 100% hynrei kane ka sorkar wat hadien 8 snem ruh, kam shym la leh eiei halor kane ka bynta. Kam shym la don tang kawei ka sien ruh ban kyntiew naduh ba kala shimti ha u snem 2018.”
“Ki nonghikai LP kila ïoh ia ka tulop kaba tang T.19,000 bad ki nonghikai UP kila ïoh T.20,000. Ngi shem jingeh ban pyndap pynbiang ïa ki jingdonkam ki jong ngi. Kala ktah ïa ka bor pyrkhat bad ïa ka ïing ka sem, kumta ngam don eiei ban ong halor ka bhah tyngka jongka sorkar. Ngin shu ieh beit ha ka jingstad jong ka sorkar” ula bynrap.
Ha kaba ïadei bad ka rai jongka MSSASA ban dawa ban thungkam pura ïa ki nonghikai SSA, u General Secretary ka AMSSASTA ula ong, “Ngi kyntu ïa ki ba kin wan ïasnohkti lem bad ngi. Ka jingthungkam pura kan long kaba lut bun bha, dei halor kata, kumta ngi la rai ban phah kyntiew ïa ka tulop. Ngi tip kan shimpor bha ïa ka sorkar ban pynryngkam pura ïa ki nonghikai. Da kane ka tulop kaba ngi ïoh mynta, ka long kaba eh bha ïa ki nonghikai SSA ban lah ban im”.