Shillong, Nailur, 03: Ka North Eastern Council (NEC) ka la pyllait pisa T. 9,58,86,765 klur ha u bnai Nailar na ka bynta ka jingpyntreikam ïa ki projek bapher bapher ha Meghalaya.
Na kane, la pyllait pisa T. 4,47,30,000 klur ban shna ïa ki 20 tylli ki iew nongrep ha ka jinglut kaba T,. 50 lak kawei, T. 4,45,50,000 klur ban shna ïa ki 10 tylli ki iew nongrp ha ka jinglut kaba T. 1 klur kawei, T. 17,19,765 lak na ka bynta ka Community Development Programme jong ki Tiwa (Lalung) Ri Bhoi district, ka C&RD block, Umsning bad T. 48,87,000 lak ban shna ïa ka iing skul ha Mawthadraishan, Eastern West Khasi Hills District.
Ka NEC ka la mang pisa T. 51.178 lak na ka bynta ban shna ïa ki iing kiba don jingïadei bad ka Skill Traiñing ha ka Animation, Visual Effects, Gaming, bad Comics (AVGC) bad IT-ITES Sector.
Da ka jingai jingmynjur ha ka 8 tarik, Nailar, 2025, ïa kane ka projek yn sa pyntreikam da ka North Eastern Region Community Resources Management Society (NERCORMS), Shillong.
Ka tnad AVGC ka ïohi ïa ka jingkiew kaba stet ha ka pyrthei bad ha India, ha kaba ka karkhana jong ka ri India la antad ba kan kiew na ka T. 188 klur ha u snem 2023 sha ka T. 419 klur ha u snem 2027.
Kane ka jingthmu ka thmu ban kyntiew ïa ka jinglah ban ïohkam, ban pynkhih ïa ka ïoh ka kot, ban weng ïa ki jingduna ha ka jingai jinghikai, ban pynroi ïa ka sengkam seng jam, bad ban pynthikna ïa ki lad kiba ïarap ïa ki samla ka thaiñ Shatei Lammihngi ha ki sap kiba ïadei bad ka kam kum ka jingpynwandur, ka VFX, ka jingshna ïa ki jingïalehkai, bad ka jingthoh khana graphic.
Kane ka projek ka thmu ban hikai bad ban pynskhem ïa kumba 400 ngut ki samla na ka thaiñ Shatei Lammihngi, da kaba sam kyrpang ha kylleng ki jylla ba kynthup ïa ka Arunachal Pradesh, Assam, Manipur, Meghalaya, Mizoram, Nagaland, Sikkim, bad Tripura.
Ïa kane ka projek la kyrshan shi bynta da ka MSDE hapoh ki kyndon jong ka PMKVY 4.0, ha kaba ka NEC ka ai ïa ka pisa kaba kongsan na ka bynta ka jaka sah.
Shuh shuh, ïa ka bhah kaba ar kaba T. 233.00 lak la pyllait ha ka 8 tarik, Nailar, 2025, na ka bynta ka projek “Establishment of Scientific Smoked Meat production units in North East India” kaba la mynjur haduh T. 484.67 lak.
Ïa kane ka projek la thmu ban pyntreikam ïa ki 17 tylli ki Physical Scientific Smoke House ha ki san tylli ki jylla, Arunachal Pradesh, Assam, Manipur, Meghalaya, bad Nagaland.
Ki jingthmu ba kongsan ki kynthup ban pynrung bad pynbeit ryntih ïa ki rukom syang ïa ka doh thad bad ban pynthikna ba ki long kiba khuid bad ki bym bit ïa ki khniang jingpang shwa ban shalan. Man la u snem, na kine ki Unit la khmih lynti ba kin pynmih kumba 867 metric tonne ka doh sniang ba la pynrkhiang, ban thaw 34 tylli ki lad kamai bad ban ai jingmyntoi beit beit ïa 1,921 ngut ki briew.
Ka jingmih kaba kongsan kan long ka jingpynduna ïa ki jingbam ba pynmih jingpang na ka doh ha ka thaiñ Shatei Lammihngi baroh kawei, da kaba pynduna ïa ka jingpang bampong ha ka shyntur bad ha ka kpoh bad kan kyntiew ïa ka jingmih kaba koit ba khiah na ka bynta ki nongbam ha ki jylla ba shah ktah.
Ha ki bnai ai kaiphod, ka “Study on the availability of Mobile and Internet Connectivity in Villages in North East India” ba la pynlong da ka NERCORMS la pyndep pura bad la pynkut noh ha ka 8 tarik, Nailar 2025.
Kane ka jingwad bniah ka pynthikna na ka bynta ban pynbha ïa ki jingtei digital ha ka thaiñ.
La pynlong ruh ïa ka Workshop na ka bynta ki samla pule halor ka jingpynneh pynsah ïa ka jingthung jhur tynrai ba kynthup ïa ki jingthung ïa ki kynbat dawai bad ki jingthung sma iwbih ha East Khasi Hill District, Meghalaya ba la pynlong da ka NERCORMS ba la pisa T. 8.00 lak bad la lah ban pyndep ha ka 19 tarik, Nailar, 2025.
Ïa ka jingïalang halor ki mar GI bad ka jingai jingbit ban pyndonkam ïa ki na ka bynta ki nongrep jong ka Jylla Meghalaya la pynlong da ka NERAMAC da ka jingbei pisa kaba T. 8.85 lak bad la pyndep ha ka 19 tarik, Nailar, 2025.
