Jowai, Naiwieng 24: U MDC ka 4-Amwi Khliehtyrshi ma Madonbai Rymbai uba ju long u CEM barim ka JHADC bad uba jop kum u MDC la saw sien naki san tylli ki jingïakhun (Term), mynta ka sngi 24 tarik u Naiwieng haka jingkren sha ki lad pathai khubor ula kyntu ïa ki khlieh nongïalam jong ka NPP ba kin bujli noh ïa u CEM ba mynta u ma Thombor Shiwat khnang ban wan biang ka jingkylla ban lait naka jingduh tulop.
Halor kane ka jingduh tulop ki nongtrei ka Council kaba la kynjop sha ka 9 bnai mynta, u ma Madonbai Rymbai u kyntu kum ka party ka dei ban jied noh da uwei u nongïalam uba don shisha ka jingtip ban pynïaid ïa ka Council haduh 90 percent kumba long ha ki por mynshwa.
Kane ka jingong u ma Madonbai Rymbai ka long halor ka nongrim jong u ba ka Council ka don ïa ki lai tylli ki tnad treikam kata ka Executive, ka Legislative bad ka Judiciary kaba long kum ha Parliament kaba ha khlieh duh jong ka Ri.
Hynrei kum ki paidbah u ong kim dei ban shah ïalam bakla namar ba ka Jaiñtia Hills ka long kaba riewspah haka jingdon jong ki marpoh kyndew, wat ki Cement Plant ki treikam manla ka sngi ban pynmih ïa ka dewbilat (Cement) bad kiwei kiwei de ki khajna ba ïoh lum, hynrei balei pat kat kane ka Revenue ngi dang duh ïa ka tulop ula buh jingkylli, shuh shuh u ong ka sorkar kala dep buh ruh ïaka District Council Affair Department kaba peit ïa ka bhah pisa kaba long daka 60/40 ne 75/25 lada pyntreikam kawei na kine kan nym jia satia ka jingduh tulop.
U la ong katkum ka jingkheiñ ka jingïoh jong ka Council da kaba kheiñ ïaka GDP ka poi 85 klur manla ka budget bad ka jingduh tulop ka lah ban jia tang shibnai ne ar bnai, hynrei mynta kala poi sha ka 9 bnait tam bad kane ka jia baroh dei na ka daw ka jingtlod u Nongïalam CEM ka Council.
