Shillong, Naiwieng, 18: U Myntri Rangbah ka jylla u Conrad K. Sangma ha ka sngi Baar u la ïathuh ba palat 87 klur tyngka la mang na ka bynta ban shna ïa ka surok Ampati-Purakhasia kaba jrong 28 kilomitar kaba hap hapoh ka Gambegre Constituency.
Haba kren ha ka jingïalang, u Sangma u la ong, “ngi la mynjur ban mang pisa T. 7.46 klur hapoh ka State Scheme na ka bynta ka bynta ka surok kaba 0-4 kilomitar, ha kaba 50% na ka jingtrei ka ladep. Na ka bynta ka 5-20 kilomitar, la mang pisa sa T.13.78 klur hapoh ka PMGSY bad sa 15% ka jingtrei ka ladep. Ka bynta kaba khatduh sa 21-28 kilomitar, la bei pisa da ka World Bank haduh T.66 klur.”
U Myntri Rangbah u la pynshai ba ïa ka bynta kaba khatduh ym lah ban pyndep hapoh ka skhim jong ka Sorkar Jylla ne Sorkar Pdeng, da kaba pynpaw ïa ka jingeh jong ka projek.
“Da lade hi nga la buddien bad bishar bniah ïa ka jingshna ïa ka surok,” u la bynrap, da kaba pynthikna ïa ki paidbah ban pynurlong ïa kane ka projek.
