Shillong, Jylliew 30 : Mynta ka sngi ha ka por kumba 5.15 ei ei janmiet uwei u runar uba kyrteng u R Marngar u la siah da ka tari na u pdot ïa ka samla Phynailin Kharsyntiew dang 27 snem ei ei ka rta, kat haduh ba kan da khlad noh na kane ka pyrthei. Kane ka la jia hapoh ka ïew Pyndenumiong ha ka jaka pynïeng kali katba u kpa u dang ïakren bad tohkit na une u runar ïa ka jingïadei jongu ba ka khun jongu bad balei u byrngem byrsit ïa ka.
Ka khubor ka ïathuh ba ka Pyrnailin Kharsyntiew bad u R Marngar ki ïadei shi samla hynrei ki la ïa jngai ne ïaphoi mynta la shisnem ei ei namar kam kwah shuh ban dang ïabteng ka jingïadei bad une u briew. Une pat u la byrngem byrsit ïa ka ban pynjah burom ïa ka hakhmat ki paidbah bad ban thad burom ruh ïa ka. Haba ka la ïathuh ha u kpa ïa kine ki jingbyrngem jongu, u kpa u la kwah ban ïa kynduh ïa utei u briew bad kumta katba dang ïaid ka jingïakren bad u kpa bad katba u kpa u dang kylli bad pyrthew ïa u, une u briew haba u ïohi ba ka Phyrnai ka don hajan kumta u la kynthih beit pum ha ka bad u kpa uba pli u dang mut ba ka shu ur hynrei kham hadien u sa ïohi ba ka la shah ot na u pdot.
Mar mar la pynkit ïa ka sha Civil Hospital Mairang hynrei ka la khlad noh katba ki doktor ki dang pyrshang ban ai jingsumar ïa ka. ïa une u runar la kem da ki pulit ka Mairang Police Station bad ki dang tohkit bniah ïa u na kaei ka daw ba u leh ïa kane ka kam pyniap ïa ka Phyrnai.
Haba ïakren bad u SP ka Eastern West Khasi Hills u bah Dangsan Syiem u la ïathuh ba um pat lah ban tip ïa ka daw namar ka jingtohkit ïa une u runar ka dang ïaid shakhmat. Tangba u la ïathuh ba ki briew na ka forensic ruh ki la wan ban leh ïa kaba donkam baroh kat kum ki kyndon ka aiñ.
