New Delhi, Jylliew, 21: Palat 800 ngut ki nong India kiba la wan phai ing na Iran hapoh ka jingpyntreikam ka Sorkar India ïa ka Operation Sindhu, la pyntip ka Ministry of External Affairs (MEA) ha ka sngi Saitjaiñ.
Kiba bun ki nong India, kynthup ïa ki samla pule ki la wan poi ha Delhi ha ka janmiet sngi Thohdieng bad ha ka step sngi Saitjaiñ hadien ba la pynkynriah ïa ki na ka ri Iran namar ka jingkynad bad ka ri Israel ka la nang jur.
Ka India ka la pyntip ba ka la pyntreikam ïa ka Operation Sindhu ha ka sngi Balang ban leit shaw lut ïa ki nong India kiba sah ha Iran.
Ha ka sngi Thohdieng, ki don 290 ki nong India kiba don ha Iran ba kynthup ïa ki samla pule bad ki nongleit riewblei kiba la wan kit da ka liengsuiñ. Ki la poi ha New Delhi ha ka por 11:30 baje mynmiet bad la pdiang sngewbha ïa ki da u Secretary (CPV& OIA) u Arun Chatterjee, la pyntip u nongaiktien jong ka MEA u Randhir Jaiswal ha ka rynsan X.
“Ka Sorkar India ka pynpaw ïa ka jingsngewnguh ïa ka Sorkar Iran kaba la pynbeit nadong shadong ban pynkynriah ïa ki nong India,” u la ong.
Ha kawei ka pat ka jingthoh, u Jaiswal u la ai ïa ka jingpyntip kaba bniah halor ka jingphah ïa ka liengsuiñ kaba wan na Turkmenistan sha New Delhi.
Ka liengsuiñ bakyrpang na Ashgabat, Turkmenistan ka la wan poi ha New Delhi ha ka por 3:0000 baje ha ka sngi Thohdieng ban wan ïalam lut ïa ki nong India na Iran. Haduh mynta, haduh 517 ngut ki nong India kiba wan na Iran ki la wan phai sha la ka ri,” u la ong.
Ka kynhun banyngkong jong ki 110 ngut ki nong India ba la pynkynriah na Iran ki la wan poi ha India ha ka sngi Palei
U Myntri Khynnah ka Sorkar Pdeng uba khmih ïa ka External Affairs u Kirti Vardhan Singh u la leit pdiang burom ïa ki nong India kiba wan poi ha kad liengsuin Delhi.
Ha kawei pat ka jingthoh,ha janmiet, u Jaiswal u la pyntip ba ka liengsuiñ kaba mih na Mashhad ka la wan poi ha New Delhi ha ka por 4:30 baje ha ka sngi Saitjaiñ kaba kit ïa ki 310 ngut ki nong India. Haduh mynta, ki nong India kiba la wan phai sha la ka ri ki long baroh 827,” u la ong.
Ka Embassy jong ka ri India ha Iran, ka la thoh ha ka rynsan X da kaba pyntip, “da ka jingkyrpad jong ka Sorkar Nepal bad ka Sri Lanka, ka Embassy jong ka ri India ka la trei shitom ha Iran ban pynkynriah lang ïa ki nongshong shnong jong ka ri Nepal bad ka ri Sri Lanka.”
