81.86% poi ki nongthep vote ha South West Khasi

By Mawphor Editor On Feb 22, 2025

Electronic Voting Machine, EVM with male hand voting sign pressing button casting vote Indian election 3D illustration

Mawkyrwat, Rymphang, 21: Ka jingjied ïa ki nongmihkhmat sha ka Khasi Hills Autonomous District Council (KHADC) ka la long kaba ïaid beit ïaid ryntih ha kaba ki nongthep vote ha ki ar tylli ki Constituency, kata, ha Mawkyrwat bad Langrin Constituency ha kaba ki nongthep vote ki la ïa mih ryntih naduh dang step ban ïeng ha u laiñ uba jrong.
Ha kane ka sngi ka jingpoi jong ki nongthep vote ki don baroh 31702 ngut na Mawkyrwat District Council Constituency kaba long 80.20% katba ha Langrin District Council Constituency pat ka poi 30255 ngut kaba long 83.67%.
Haba kheiñ lang ïa ka jingpoi jong ki nongthep vote ha baroh ar tylli ki Constituency, kata ha Mawkyrwat bad ha Langrin District Council Constituency ka long baroh 61957 kaba kot 81.86%.
Katkum ka jingpyntip na tnat Election jong ka ophis jong u Deputy Commissioner, South West Khasi Hills District kawei na mashin EVM ladep ban bujli na ka daw jong ka jingsniew kata ha Upper Puksora. Ka jingthep vote ka la ïaid beit khlem kano kano ka jingthud.