Khliehriat, Naitung, 20: Ki nongïalam shnong jong ka Khliehriat West bad ka Khliehriat East ha ka sngi Thohdieng jong ka taiew baladep kiba la pynlong ïa ka jingjurip ki la lap ba 80 percent ka surokbah National Highway-6 ba la siang da ka dewbilat ha ka bynta jong ka sor Khliehriat ka la orpait bad ki don ruh ki dak ba la julor.
Halor kane, u Waheh Shnong jong ka Khliehriat West u Bah Justine Dkhar bad u Waheh Shnong ka Khliehriat East u Bah Kedius Rymbai hynin ka sngi Saitjaiñ ki la aiti da ka jingthoh sha u Project Director jong ka National Highway Authority of India (NHAI) ban pynsngew halor ka jinglong jingman jong ka surok bad dawa ban dei ban shna bha ha ka rukom kaba paka.
Ha ka jingjurip ba la sakhi lang da ki nongmihkhmat ka NHAI bad u Block Development Officer ka Wapung C & RD Block u Dr. T.Shylla la lap ba dang don bun bha kiba dang donkam ban pynbit pynbiang ha kaba pyntrei ïa ka surok National Highway ha ka shnong Khliehriat kaba dei ruh ka Headquatar jong ka East Jaiñtia Hills District.
Ki bos synshar shnong jong ka Khliehriat East bad West ki la kyntu ïa ka NHAI ka dei ban shna ïa ki nala pyntuid um kiba bha ha baroh ar liang ka surok bad ha ka por ba shna ïa ki nala u Kontraktor ruh u dei badn da peit bha ba ka um na ki nala kam dei ban tuid pathar sha surok bad ka um kam dei satia ban lang shi jaka ha ka nala.
Ki la pynpaw ba donkam ruh ban shna bun tylli ki nala lane ki Cross Drainage ha kiba bun ki jaka bad la kyntu ïa ka NHAI ban maramot bha ïa ka surok ba ieng ki kali ha Khliehriat East kiba leit sha ka shnong Byndihati.
Kiwei kiwei ki jaka kiba donkam ban dang maramot bad ban shna pynbha ki kynthup ruh ïa ka lad na surokbah National Highway ban leit sha jaka ba sah u Deputy Commissioner, ka lad ban leit sha ka ophis u District Session Judge ha Khliehriat, ka surok ba don ka khyrdop ban rung sha ophis u Deputy Commissioner ha Khliehriat, ka lad ban rung sha surok shnong sha dong Lad Wah Ïangaw kaba don pyrshah ïa ka 1-India Shopping Mall, ka lad ban rung sha Jaiñtia Eastern College, ka lad ban leit sha ka dong Motha Thlen kaba dei ka surok ban leit sha ophis u Superintendent of Police ha Khliehriat, ka lad ban rung sha ka dong Chasem ban leit sha Khliehriat Branch, ka lad ban leit sha ka dong Lad Lum Syntu Laber (Lum Malik).
Halor kine ki jinglap ha ka jingjurip, ïa ka kaiphod la la pynbit pynbiang da u BDO ha kaba yn sa phah pat sha ki bor ba dei peit lane sha u Deputy Commissioner bad sha ka NHAI.
Ha ka shithi ba la phah sha u Project Director jong ka NHAI, ka Dorbar Shnong Khliehriat East bad West ki la pynpaw ba ka jingpyntrei ïa ka surok ka long kaba suki shaba palat bad kane ka la wanrah bun ki jingeh ha ka leit ka wan jong ki paidbah bad kaba wanrah ruh ïa ka jingdheng kali kaba jur ha ka sor Khliehriat kaba ktah ruh wat ïa ki kali kit nongpang kiba donkam ban pynpoi kyrkieh ïa ki nongpang sha ki jaka ai jingsumar, ka jingshah ktah jong ki kali jong ka tnat Fire & Emergency Services bad ka jingdheng kali ruh ka slem bha kaba wanrah ïa ka jingthut ïa ki paidbah baroh.
Ha kaba ïadei pat bad ka jingshna ïa ki nala pyntuid um, la kyntu ba ka NHAI ka dei ban da shna bha khnang ba kin ym buh jingma ïa ki nongïaid lynti da ka kjat namarba don ki jaka ki bym don satia ka jingtap dewbilat nalor ki nala ba ju ïaid ki paidbah bad kane ka buh ruh ïa ki paidbah ha ka jingma.
