80 % ki nongshong shnong ki hap hapoh ka jingkhmih ka tnad C&RD kyntu u CM ïa ki nongtrei ban aiti lut

Shillong, Nohprah 02 : U Myntri Rangbah ka Jylla Conrad K Sangma ula ong ba 80% na ki nongshong shnong ka Jylla ki dei kiba hap hapoh ka jingkhmih ki briew kiba trei hapoh ka Tnad C&RD.
“Namar kata, phi don ïa ka jingkitkhlieh kaba khraw bha bad nga kyntu ïa phi ban ïai bteng ha ka ban trei da ka jingkut jingmut bad jingaiti lut ha ka kam” ong u Conrad ha ka jingplie ïa ka ïing Ophis jong ka Directorate of Community & Rural Development (C&RD) ha Lower Lachumiere, Shillong.
Kiba ïadonlang ha kane ka sngi ki kynthup ïa u Myntri ka tnad C&RD Bah Sosthenes Sohtun, u Chief Secretary ka Jylla Dr Shakil P Ahammed, Principal Secretary ka tnad C&RD Sampath Kumar bad Director ka C&RD SC Sadhu.
Haba ai jingkren, u Myntri Rangbah ula ong ba ka tnad C&RD ka don ïa ka bynta kaba kongsan bha ha ka jingkyntiew ïa ka ïoh ka kot bad ka rukom im jong ki nongshong shnong ha ki jaka nongkyndong.
“Ka Tnad C&RD kala treikam bha da ka jingkut jingmut bad jingaiti lut ha ka ban pynpoi ïa ki skhim, ki project bad ki kam bha lang sha ki shnong nongkyndong, kaba wanrah ïa ka jingkylla ha ka jingim jong ki briew ha ki shnong ki thaw” ula ong.
Haba ai khublei ïa ka Tnad ïa ka jingïoh ïa kane ka ïing Office , u Myntri Rangbah ula ong ba watla ki jingtei/Ophis ka long kaba kongsan ban lah treikam bad shakri bha,”Ka dei u klongsnam bad ka mynsiem kaba ka jingtrei jong phi ka wanrah ïa ka jingpher”.