Shillong, Jylliew 11 : Ïa ka Sonam Raghuvanshi ryngkat bad saw ngut kiwei pat kiba la suba donkti ha ka jingpynïap ïa u kurim jong ka, u Raja Raghuvanshi ha Sohra dang shen, la tian bishar ïa ki ha ka janmiet sngi Balang ha Iingkashari Chief Judicial Magistrate ha kaba la ai bor ruh phra sngi ïa ki pulit ban tohkit.
“Kine baroh san ngut kiba suba donkti kin don ha police custody na ka bynta phra sngi,” ong u Superintendent of Police ka East Khasi Hills, Bah Vivek Syiem.
Kumban shu pynkynmaw, ïa ka Sonam la kem noh na Uttar Pradesh hadien ba ka la leit bna pyndem noh ha Nandganj Police Station ha Ghazipur district katba ïa ki saw ngut kiwei pat ba kynthup ïa u Raj Khuswaha (21), Akash Rajput (19) na Lalitpur, bad ïa u Vishal Singh Chauhan (22) bad Anand Kuli (23) la kem ïoh kem Indore.
Ïa kine baroh sawngut la ïalam sha Iingkashari ban shah tian bishar ha ryngkat ka jingpahara kaba jur.
Na ka liang u SP haba kren bad ki lad pathai khubor u la kyntu ruh ïa ki paidbah ba kin kiar katba lah ban pynphriang ïa ki khubor bym dei.
“Ka la don ka jingtohkit kaba la pyndep ha kitei ki jylla hynrei ïa kine kiei kiei pat donkam ban pynshisha bad pynskhem ryngkat bad ki sakhi,” u la ong.
Haba jubab halor ka jingkylli, u SP u la ong ruh ba kumba long haduh mynta hi, ki dang don tang san ngut kiba la shah kem haba ïadei bad ka jingsuba donkti ha katei ka kam pynïap briew.
“Dei tad hadien ba la ïaid ka jingtohkti ba yn sa lah ban pynshisha la kidei tang kin eki briew kiba donkti ha kane ka kam,” u la bynrap biang.
Na ka liang u SP u la pyntip ruh ba ïa mynta kin ym pat ïalam ïa kine ki san ngut sha Sohra ban shai shuh shuh haba ïadei bad katei ka jingjia namar ki dang donkam shwa ban tohkit bniah.
Ha kane ka sngi, u SP u la pyntip ruh ba katkum ka kaiphod ba ki ïoh la kdew ruh ba ka Sonam kam pat armet.
Shwa kane, u la ïathuh ba hynin ka sngi la ïalam ïa ka Sonam sha Ganesh Das Hospital na ka ban check-up bad ka kaiphod kaba ki ïoh ka pyni ba ka long negative kaba mut ba kam pat armet.
Shuh shuh u la ong ba halor kane, ki hap ban phah test biang ïa ka hadien 24 kynta. Katkum ka jingong jong u, ki la don bun ki khubor kiba la phriang kaba ïadei bad ka jingarmet jong ka bad dei na kata ka daw la ïalam ïa ka sha Ganesh Das Hospital kaba dei ka hospital jong ki longkmie bad ki khunlung ba dang kha ban phah test da kaba buh hakhmat ïa ka jingshngaiñ jong ka koit ka khiah jong ka.
