8 sngi ai bor ka ïingbishar ban tohkit ki pulit ïa u nongpynïap ïa u khynnah 7 snem

Shillong, Iaiong 3: Ka ïing Bishar ha ka sngi Palei, ka la aibor ïa ki pulit ban set ha byndi ki pulit haduh 8 sngi ïa u Kenedy Khongsit, uba la shah kem halor ka jingdonkti ban pyniap ïa u heprit 7 snem, Kyrshanbor Kharmudai, ha Lum Myrboh, Nongrah.
U Kenedy uba la don 32 snem ka rta, ula shah ïalam sha ïing Bishar hadien ba ula shah kem ha ka sngi Balang na ka ïing sah ka jongu kaba don ha Lum Myrboh.
U Kenedy, udei u paramarjan jong utei u heprit uba la shah pyniap, ula shah kem hadien ka jingïoh sabut ki pulit jongka Special Investigation Team (SIT) kaba la thaw hapoh ka ialam jongu SP (City) ka East Khasi Hills.
Une uba la shah kynnoh ula phla ïa ka jingpyniap ïa u heprit namar ka jingbitar kaba la jia ha ka 8 tarik u Risaw 2025, haba une u heprit um shym la kohnguh ïa ka jingbthah ka jongu ban wanrah ïa u u brut bad ka borti namar u pynkhuid top Syntex.
Ki pulit ki la ïathuh, ba u Kenedy hadien ba ula dep pyniap ïa u heprit ula leit bret ïa ka metiap ha ka khlaw kaba don ha Mawpat da kaba pyndonkam ïa ka Scooty Yamaha R-Z rong lieh jong u bakha jongu.